ORANJESTAD (AAN) – Den conferencia di prensa relaciona cu e ciclo di reunionnan cu Stakeholders, den e cuadro di formacion di Gabinete Wever-Croes II, señor John Hessen, di Inspeccion di Enseñanza, a relata con a bay cu nan reunion cu Formador Wever-Croes.
Señor Hessen a indica cu e reunion cu Formador a bay bon y cu e tabata un encuentro hopi informativo den cual, como Inspectie, nan a trece dilanti e aspectonan principal di nan trabao, cu ta controla e calidad di enseñanza y tambe a menciona e doorlichting.
El a señala cu Inspeccion di Enseñanza ta bezig cu e doorlichting den cuadro di e Landenpakket, y tabata tin un delegacion di Hulanda cu a bishita Aruba y hunto cu Inspectie a cuminza cu e trabao aki.
Nan a duna Formador, un relato tocante loke nan ta bezig caba, y tabata tin oportunidad pa nan contesta preguntanan cu a worde haci encuanto e trabao di Inspectie y aspectonan cu ta regarda Enseñanza na Aruba.
El a splica cu un di e puntonan cu tin den e doorlichting den cuadro di e Landenpakket, ta cu esaki ta worde haci door di Inspectie Hulanda hunto cu Inspectie Aruba, den cual ta bay wak kico ta e “doelmatigheid” (eficiencia) y deficiencianan cu tin den Aruba su sistema di enseñanza.
John Hessen a indica cu, naturalmente, e puntonan aki lo bin den un rapport cu lo ta cla na October, unda lo duna recomendacionnan di loke mester drecha y e cosnan cu ta cana bon.
“E ta un analisis di con enseñanza na Aruba ta draai”, John Hessen a acentua.
El a sigui splica cu den e prome bishita cu e delegacion di Hulanda a haci, nan tabata tin combersacionnan cu hopi stakeholders, y e tabata un introduccion, unda nan a haya tur informacion y aworaki nan tin cu bay wak cual informacion nan ta uza y cual no, y e ora ey nan lo bin cu un rapport, pues ainda Inspectie no por sa kico ta e resultado di e onderzoek cu nan ta bezig cune. “E doorlichting aki ta bay mustra kico a worde haci y kico falta” Hessen a indica.
El a splica cu loke si Inspectie di Hulanda ta pone atencion riba dje ta e uso di finanzas y e leynan cu ta worde uza den enseñanza.
Inspeccion di Enseñanza, señor Hessen a agrega, ta mira cu lo tin recomendacionnan pa mehoracion di enseñanza na Aruba, riba cierto terenonan y cosnan cu mester worde haci den termino cortico. “Loke nan a haya ta documentonan, informacion y cu esey awor nan ta bay duna un bista di kico ta pasando akinan. Pero loke si mi por bisa ta cu e bishita tabata hopi positivo”, señor John Hessen a señala.
