Desiree Thode director di Departamento di Adulto Mayor:
ORANJESTAD (AAN) Señora Desiree Thode-Helder, directora di Departamento di Adulto Mayor, tambe ta bay forma parti di e Conferencia “Generation SWAP”, cu ta den forma di intercambio.
Den entrevista cu DIARIO, el a expresa palabranan di danki na ATHA pa su invitacion pa e conferencia aki.
“E ta hopi importante pa nos participa den e evento aki, conhuntamente cu organizacionnan manera ATHA, organizacion di hobennan y organizacion di Adulto Mayor. E ta importante pa nos como Directie Ouderenzaken pa trece comunidad hunto. E t’asina cu ta parti di nos maneho integral pa trece adulto mayor hunto cu otro organizacionnan tambe, pa combersa, intercambia cu otro, y sostene otro.
Pa e motibo aki nos ta duna nos cooperacion sincero y participa den tur e combersacionnan pa nos por yega na otro, pa traha no solamente un conferencia pa e publico en general di Aruba, na unda cu e tema central ta e intercambio di generacionnan pero tambe pa bin cu tayernan di trabao unda cu e adulto mayor y e hobennan por intercambia di informacion por siña di otro, y enberdad por comunica miho cu otro.
Pesey tambe nos ta duna danki na tur esnan presente pero nos ta invita tambe publico en general, pa participa den e conferencia, pa inscribi pa dia 23 di Mei, pero tambe pa participa den e tayernan di trabao. Cu esakinan nos kier stimula intercambio, pasobra aki na Aruba tin diferente generacion, diferente persona di diferente edad, pero nos ta un Aruba. Nos ta un Aruba cu ta sostene nos hendenan y cu ta cuida otro”, señora Desiree Thode- Helder, director di Departamento di Adulto Mayor, a declara.
