Pa tur trahado y dunado di trabao na Aruba
ORANJESTAD (AAN): Minister di Labor mr. Wendrick Cicilia conhuntamente cu Departamento di Labor y Investigacion (DAO) ta anuncia cu a amplia e aplicacion ‘Sueldo’ y awo ta disponibel den 4 idioma: Hulandes, Papiamento, Ingles y Spaño.
Cu e contribucion aki, unda por calcula e salario minimo pa ora den e idioma preferi, Ministerio di Labor y DAO kier duna un servicio mas accesibel y eficiente na tur trahadonan y dunadonan di trabao na Aruba, permitiendo nan pa haya informacion completo y confiabel.
A desaroya e ‘Sueldo App’ specialmente pa duna informacion y guia durante e transicion pa e introduccion di e salario minimo pa ora, cu a drenta na vigor dia 1 di januari 2026 cu un tarifa di 11,58 Florin pa ora. E app ta duna tanto e trahadonan como e dunadonan di trabao un indicacion rapido y facil pa controla si a aplica e cambio di ley. Lo sigui desaroya e ‘Sueldo app’ den futuro pa por sirbi como un ‘tool/herment’ pa facilita e trahadonan pa controla nan salario ricibi.
E app aki ta poni riba e website aki:
Aruba ta un comunidad multilingual y diverso. DAO kier sigura cu ningun trahado of dunado di trabao ta keda sin acceso na e informacion corecto debi na barera di idioma. E adicion di e 3 idiomanan nobo (Papiamento, Ingles y Spaño) banda di e idioma original (Hulandes) ta garantisa cu hopi ciudadano y residente por calcula y verifica nan derecho y obligacion laboral sin dificultad.
