Prome Minister Wever-Croes ta gradici sindicatonan
ORANJESTAD (AAN): Dialuna mainta den conferencia di prensa, Prome Minister Evelyn Wever-Croes a felicita sindicatonan y tur empleado publico como semi-publico den cuadro di e noticia di e stopmento di recorte di salario.
"Mi sa cu e lucha tabata un lucha hopi duro. Mi sa e sacrificionan tabata sacrificionan hopi grandi. Y aworaki den temponan hopi insigur cu nos ta aden, nos no conoce e efecto di por ehempel, e conflicto na Ukraine y nos no sa con largo e ta bay dura", e mandatario a indica.
Ta mira cu prijsnan a aumenta drasticamente. Aruba ta importa practicamente tur cos y ora di importa algo di un pais caminda aya e prijs a subi logicamente ora nos import'e e prijs ta halto tambe, a bisa.
Enfrentando e temponan insigur aki, e stopmento di e recorte maske ta parcial aworaki sigur lo yuda y esey Premier Wever-Croes a bisa cu e ta aprecia hopi cu por ta asina leu.
"E lucha di e sindicatonan, di e empleadonan publico y di gobierno nos tabata semper para na e mesun banda y aworaki por bisa cu nos ta weita perspectiva", a expresa.
