ORANJESTAD (AAN): Keto bay Glenn Thode ta presidente di Conseho Electoral, y lo tin e funcion ey tambe pa Eleccion 2021. Ultimo simannan el a tuma nota di algun pregunta cu kizas ta inclaridad encuanto kico ta bay tuma lugar
dia 25 di Juni 2021, cu ta eleccion na Aruba.
Durante un conferencia di prensa via Microsoft Teams, Glenn Those a splica cu pa eleccion di e aña aki, a bin cu 3 punto extra pa asina yuda e proceso di votamento bay mas rapido posible, pa asina tin menos intercambio fisico pa reduci e riesgo di plama e virus.
LO TIN 70 STEMBUREAU:
E cantidad di Stembureau na Aruba lo amplia y yega te na 70. Banda di dje lo tin e Bijzondere Stembureau A y tambe B.
Compara cu 2017, e biaha aki lo tin 8 Stembureau adicional. Esaki lo bay yuda reduci e cantidad di votador na cada stembureau. E lo ta un promedio di 1.000 persona pa cada urna cu lo ta votando. Esaki ta algo pa den e pandemia aki, evita cu lo tin aglomeracion di hende na un urna. Tambe lo bay imprimi riba e Oproepkaart un periodo di horario cu nan ta sugeri pa bo bay vota, pa evita aglomeracion di hende. Pasobra cierto horario na Aruba, diripiente bo ta haya un monton di hende votando na mesun momento.
Na cada stembureau tin dos forma cu Sosten Electronico lo bay yuda pa 2021, pues cu menos papel ta pasa di man pa man, y cu menos aglomeracion, reduciendo chens di contagio cu e virus.
E dos puntonan importante ta: 1) E oproepkaart cu e votador ta presenta cune, lo tin un sosten electronico. 2) Sistema electronico lo bay facilita conteo, esta cu cada votador na final tin di scan su biyete ora di deposite den e drum di stembus.
OPROEPKAART:
Ora bo yega cu bo oproepkaart dilanti Presidente di Urna, bo tin di mustre e carchi aki. E carchi lo bay tin un QR-Code imprimi riba dje. E Presidente lo tin un Tablet special cu e ta usa pa scan e code aki, y ta conecta cu e Registro di Votador, y ta haya asina e nomber. E ora e persona tin di mustre su cedula sin cu e presidente ta mishi cune. Asina ta verifica si e nomber ta match e Registro di Votador.
E ora e Presidente ta dune bo Stembiljet. Segun Glenn Thode, na ningun forma lo conecta e cedula di e votador, cu e Stembiljet ey. No tin forma pa conecta esey cu otro en absoluto. Pues secrecia di voto ta garantiza aki.
SCANNER SPECIAL:
Cu e Stembiljet den man, e votador ta bay na e hoki, unda e ta yena bala cora. E ta dobla e Stembiljet bek, sali di e hoki y bay na e Drum di Stembus. Aki tin riba e Stembus un Scanner instala.
E votador tin di habri e stembiljet bek cuidadosamente cu e lista imprimi banda abao di e papel, y ta pone esaki den e scanner. E scanner ta bay cu e papel poni boca abao (cu e bola cora poni abao). E aparato aki ta detecta y determina e bala cora riba e stembiljet y asina e ta registra solamente e lista y e candidato cu a haya e voto. Ta haci esaki invisiblemente den e sistema. E scanner despues ta deposita e biljet den urna y ta indica cu e proceso a bay bon.
E scanner aki no ta conecta na Internet, no tin Wi-Fi, y unico waya cu ta sali di dje ta esun cu ta plug na coriente. E scanner no por transmiti ni ricibi ningun informacion, ni registra e hora exacto cu cierto papel a wordo gescan, pues hamas por “liga” un biljet na un cedula di votador.
Ora cu anochi yega y Stembureau ta cera. E president na final di dia, ta bay den e Menu di e scanner, y ta pidi pa e Total. E Scanner ta imprimi un papel cu conteo di stembiljet. Esaki ta contene conteo di cantidad di stembiljet, e cantidad di voto pa lista, cantidad pa candidato, y cantidad invalido. Pues den menos di 1 minuut, e Scanner lo duna e Stembureau aki nan resultado preliminar!
E resultado preliminar aki lo wordo manda pa Hoofd Stembureau y pasa pa prensa.
Despues di tur esey, e buzon lo wordo habri y ta bay conta cada stembiljet manualmente.
Si acaso e cantidad di votonan via e Scanner, y e cantidad conta manual di biljetnan no ta cuadra, lo conta e biljetnan di nobo.
E resultado oficial ta e conteo via e stembiljet, segun Glenn Thode a splica.. Ora di conta un biaha mas, e President di Stembureau lo traha procesverbaal cu tur particularidad di dia y pone e conteo final di biaha. E procesverbaal aki ta esun cu ta valido pa e conteo.
Den dianan venidero lo bay tin campaña di informacion y video, pa mustra tur hende con ta pone bo stembiljet den e scanner, y e proceso pa haci esey.
