ORANJESTAD (AAN): E bon noticia ta cu tanto e Pre-Finalnan y e Final di Festival Aruba Caiso & Soca Monarch 2025 lo ta disponibel na TV via e sistema di Pay-per-View, esta PPV.
Sigi tur anochi di e festival via Pay-per-View na Aruba y den exterior Tur aña e demanda pa por sigi Aruba Caiso & Soca Monarch via Pay Per View ta halto. Ambos na Aruba y den exterior, publico ta pidi pa e oportunidad pa sigi e festival “Live” na television of via un device, pa no perde ningun presentacion, biba tur e momentonan excitante y sinti e suspenso di e competencia.
Stichting Musica y Setar NV ta hopi entusiasma cu tur anochi di ACSM2025 lo ta disponibel via e sistema di PPV. E Prefinals di e festival, cu ta conta cu registracion di 18 banda y mas di 60 produccion nobo, lo tuma lugar riba dia 14, 15 y 16 di januari y e anochi Final di e festival lo ta riba dia 8 di Februari 2025.
E pakete di PPV pa tur 4 anochi ta costa 99 Florin (US$ 56.57) y por wordo cumpra via un credit card (local of internacional) riba e website aki: https://ppv.setarcode.aw/musica.
Esnan cu ta na Aruba, por cumpra e pakete via Pay.AW tambe. Clientenan cu tin account na Setar y kier mira ACSM2025 riba nan television, por haci esaki yamando 525-1002 of por pasa na cualkier Teleshop di SETAR. Cu compra di e pakete di PPV, clientenan cu tin IPTV y Setar Complete lo por wak ACSM2025 na canal 127 y clientenan cu Digital Cable na canal 126 (SD) y Canal 127 (HD).
