Solange Tchong, PR AZV:
ORANJESTAD (AAN) -- Den entrevista cu DIARIO, Relacionista Publico di AZV, Solange Tchong, a elabora tocante e manera con e servicionan di Instituto Medico San Nicolas (ImSan), specialmente Oncologia, a yuda AZV pa mas pashent haya tratamento localmente y baha e cantidad di pashent pa bay Colombia. Esaki pa AZV y sigur pa e comunidad ta un logro exitoso. Solange Tchong a relata lo siguiente:
“T’asina cu actualmente si nos por wak na exitonan nos por bisa cu for di e periodo cu e pandemia a start na 2020 pa 2023, loke sigur a yuda tabata cu desde cu Instituto Medico San Nicolas a habri, nan ta dunando servicio na pashentnan di Oncologia, y sigur esaki a beneficia AZV totalmente, pasobra den pleno periodo di dificultad pa cu e pandemia pero pa diferente aspecto, manera cu Colombia a cera, etc., e tempo ey por wak cu el a yuda hopi.
Aruba mes tin e profesionalnan medico pa yuda nos pashentnan cu cancer, kiermen cu eynan tin un parti na unda cu nos a mehora, pasobra e pashentnan aki prome nan tabata bay Colombia pa haya cuido medico, aworaki nan ta haya e cuido ey na Departamento di Oncologia na ImSan mes, cu ta traha y guia nan pa nan haya nan tratamento”, Solange Tchong a relata.
Tchong a subraya cu esaki ta exitonan cu si wak bek, por bisa cu den un periodo asina dificil toch esaki a bay dilanti.
