Gabriela Helder, Presidente saliente di FUNARI:
ORANJESTAD (AAN) Gabriela Helder, ken recientemente a cede e funcion di Presidente di Fundacion Funari na señor Danilo Werleman, den entrevista cu DIARIO a señala cual ta e reto di mas grandi cu e Stichting tin actualmente.
E reto di mas grandi pa Funari ta haya boluntarionan pa traha y hende pa forma parti di e bestuur, mirando cu ta un trabao cu no ta ricibi pago p’e.
“Pero e pago cu bo ta ricibi ta e alegria, smile di e clientenan, esey ta e parti di mas importante cu mi ta kere mi ta traha p’e y mi ta vocifera pa mas hende bin yuda y asina duna bek na comunidad”, Gabriela Helder a expresa.
El a agrega cu Aruba tin hopi profesional cu a studia afo, y cu Funari a haya di un forma of otro, y di e manera aki por duna bek tambe.
Funari ta cumpliendo e luna aki 45 aña di existencia, y el a wordo lanta pa un Soeur, cu a preocupa cu tabata tin hopi persona cu limitacion na Aruba, cu nan no tabata por sali, anto el a dicidi di bin cu un cambio.
E Soeur, cu nan tabata yame Graciosa, tabata e prome ‘abogado’ pa e personanan cu limitacion y danki na dje, na su trabao awe Funari tin fruto. E fundacion ta traha y clientenan nobo ta biniendo cerca dje, y Aruba mester ta mas conciente di cuanto persona cu limitacion tin. “Hopi estudio tin cu a wordo haci pero lamentablemente, no ta tur ora e contactonan t’ey pa por haya tur informacion. Pero mi ta kere cu mester tuma nota cu Funari ta haciendo un bunita trabao pa nos hendenan cu tin un limitacion di un forma of otro, y cu nos no ta exclui ningun hende. Tur hende ta bon bini cerca nos”, Gabriela a subraya.
Encuanto e hecho cu Gabriela a baha como presidente di e fundacion pa laga otro persona na su lugar, el a comenta cu el a laga e organizacion den bon estado. E ta keda miembro di e bestuur, locual ta hopi importante pasobra nan mester keda yuda y duna. “Aworaki nos tin cu sigui busca mas hende, p’asina ey nan por keda traha pa Funari. Mi no ta kere den un bestuur cu ta keda hopi tempo, pa motibo cu bo ta bira mucho custumber, pero e mester keda un reto. Y cada posicion tin un reto cu ne. Dus, esey ta e parti mas importante cu awor Danilo a tuma over e Presidencia, e ta un reto p’e. Danilo ta fuerte den esaki y mi ta kere tambe cu e ta un valor agrega pa nos”, Gabriela Helder a acentua. Finalmente, Gabriela Helder a gradici tur persona cu a colabora cu ne, y otro personanan di e bestuur.
