Awe mas cu nunca representacion di Pueblo mester haya contenido --- *Base financiero di 2022 ta wordo trata durante turbulencia mundial --- *Kico desaroyonan mundial lo haci cu e planificacion di Aruba?
ORANJESTAD(AAN)—Politica mundialmente ta conoce uno di su momentonan mas importante den historia moderno.
2022 a presenta na mundo un situacion cu ningun hende a spera y a deshaci di tur loke por a wordo planifica pa 2022 y te awe ta wordo planifica.
Ta na e momentonan di turbulencia grandi carga pa problemanan humano na prome lugar, liderazgo mester bira realidad y democracia mester haya contenido.
Democracia ta nifica gobernacion pa Pueblo di Pueblo y cu Pueblo.
Pueblo, hende, ta e figura central den politica y awe tur cu a considera nan mes yama pa ta politico, tin un encargo sumamente grandi.
Kico un lider por haci cu su pais y cu henter mundo, ta wordo presenta dor di Vladimir Putin cu a pone bida di miembronan di su propio poblacion, directamente na peliger di morto cruel.
Ta como lider mundial, Putin a manifesta su mes como generador di un guera cu por tin resultadona sumamente serio pa un mundo, cu no ta na haltura kico spera den e temporada nobo.
Na 2020, Covid-19 a destrui bienestar mundial. Na 2021 mundo a trata di recupera pero na final Omicron a deshaci di speransa. Na 2022 mundo no ta wordo confronta solamente cu e episodio mas recien di Covid-19 cu ainda ta un peliger, pero cu e crueldad di un lider politico, yama Putin, cu a destrui speransa di mundo pa na 2022 drenta un epoca nobo.
Politiconan na Aruba na e momentonan aki mester trata cifranan di un pais, cu mester tin base pa sigui cana.
E base financiero di Aruba ta su presupuesto, den cual su cifranan di entrada y gasto ta representa e trabou cu mester wordo haci dor di politiconan den Parlamento di Aruba y den Gobierno di Aruba.
Awe e responsabilidad di democracia ta bira realidad, na momento cu tratamento di presupuesto di Aruba ta tuma lugar.
Ora mira atras riba tratamento di presupuesto den Parlamento, ta topa na hopi occasion cu un plataforma pa hunga politica.
Confrontacionnan cu no ta hiba na bienestar di e pais, ta uno di e realidadnan mas grandi den tratamento di cifranan cu mester ta base di gobernacion sano.
Kico por pasa cu democracia, cu e bienestar di Pueblo, ora mundo politico no tene na reglanan pa maneha e pais segun ley ta exigi manera, ta algo cu no mester puntra Aruba.
Te awe Aruba ta victima di resultadonan di politica cu no a mira bienestar di Aruba pero popularidad di politiconan cu a tuma medidanan financiero cu a destrui entrada di Aruba, pero a produci voto pa asina for di 2014 Aruba ta bou supervision di Hulanda.
E situacion mundial actual no ta permiti wega politico awe na momento cu representantenan di Aruba mester mantene nan bista riba bienestar di e pais, cu mester landa sin e flota di un reserva financiero den situacionnan mundial sumamente dificil.
Kico lo pasa awe cu Aruba? Kico lo pasa awe cu mundo?
Ora dia habri den e situacion actual, ningun hende na mundo ta na haltura con e dia lo termina.
Awe mas cu nunca e base financiero di Aruba mester wordo trata cu un sentido grandi di responsabilidad di parti mundo politico na mando di Aruba den Parlamento, cu mester duna prueba cu realmente interes di Aruba ta dilanti sigur den un panorama mundial preocupante, cu ta deshaci di tur seguridad di loke futuro por nifica pa tur pais na mundo.
Palabra ta na Parlamento, cu manera DIARIO a demostra cu prueba den su man, por a evita e caida financiero di Aruba, e supervision financiero di Hulanda riba Aruba, e peso di belasting pa paga debe y proyectonan PPS, su Parlamento a asumi su responsabilidad enfrente Aruba manera documentonan financiero ta duna prueba!
