Pabien y danki Cruz Cora Aruba:
ORANJESTAD (AAN) – DIARIO no por keda sin recorda cu awe, 8 di Mei, ta wordo celebra e Dia Internacional di e red humanitario mas grandi di mundo, cu ta Cruz Cora.
Riba e fecha aki su fundador, Henry Dunant a nace y pesey a decreta 8 di Mei na mundo, como Dia di Cruz Cora, y pa honra su memoria e meta di e celebracion aki ta pa reconoce e noble labor di e boluntarionan y trahadornan di Cruz Cora, cu tur dia rond mundo, ta scapa bida di hende bao diferente circunstancia, y ta yuda esnan mas desafortuna y ta inspira otro gruponan y individualnan riba solidaridad y altruismo.
Un demostracion hopi grandi di esaki ta e trabao cu na henter mundo, y sigur na Aruba, Cruz Cora a desplega cu partimento di cuminda y otro sorto di ayudo, durante e pandemia, na hopi famia unda un of tur dos mayor a keda sin entrada, y cu varios di nan no a haya FASE, entre nan diferente persona stranhero cu, pa un of otro motibo, no por a regresa nan pais na momento cu Aruba mester a cera frontera.
Cruz Cora a traha riba un plan di respuesta dilanti Covid-19 cu cual a bin cu accionnan di sensibilizacion y informacion na e pueblo, concientizando riba e importancia di keda cas mas tanto posible, pa contene e plamamento di e virus.
Pues, un relato corto pa reconoce y gradici un instancia cu unda tin e necesidad, e urgencia, e calamidad semper tey pa traha den team cu otro institucionnan, pa duna e yudanza unda ta rekeri di esaki.
