ORANJESTAD (AAN) – Diaranzon 3 di November aki, fraccion di Partido Movimento Electoral di Pueblo (MEP), a tene su conferencia semanal di prensa, y esaki tabata na encargo di Parlamentario Marco Berlis, cu a elabora riba e situacion di e Fisioterapistanan.
E parlamentario a elabora tocante e reunion cu e Comision Fiho di Salud tabata tin cu e Fisioterapistanan, tin tres punto di preocupacion cu Berlis a menciona y cu a bin dilanti durante e reunion aki. Berlis a indica cu e Comision aki ta wordo presidi pa Parlamentario Arthur Vallejo, di fraccion di MEP. E tabata un reunion basta largo unda cu e Fisioterapistanan a vocifera diferente punto di preocupacion y tambe di atencion, cu e parlamentario ta considera cu ta na su lugar.
El a duna algun impresion di e informacionnan cu a wordo comparti Diamars atardi. Un di nan ta cu practicamente for di 2001 pa 2021, e tarifanan di e fisioterapistanan no a bay dilanti, sino cu a bay atras na algun momento, y aworaki ta practicamente mescos. Nan a bay 55 cent atras, pa cada consulta. E parlamentario ta haya cu “esey no por” pasobra den 20 aña e inflacion a hunta un rol hopi grandi riba e profesionalnan aki, y e ta kere cu esaki ta algo di preocupacion. Ademas, nan ta sinti nan mes hopi limita debi cu e cantidad di pashentnan cu nan por trata ta hopi limita y esaki tambe ta afecta nan y ta crea un lista di spera tambe.
Adicionalmente, a wordo menciona cu ora nan no ta traha of ora nan ta tuma vacacion, e ta “no work no pay”. Nan tabata sinti cu ademas di tur loke ta limita y afecta nan, intencion tabata pa saca nan for di e pakete di AZV, pero di parti di gobierno, Minister Dangui Oduber a reuni cu e Fisioterapistanan y a reitera cu sin duda nan ta hunga un papel importante, y cu sigur nan lo continua den e pakete basico di AZV.
Tambe nan a bisa cu ta hopi importante pa traha riba prevencion, y a declara cu 33% di nan clientenan ta hende riba 65 aña di edad, y cu esaki sigur, cu tur locual ta pasando aworaki, cu e recortenan di AZV di 60 miyon, lo por afecta e grupo aki grandemente door cu nan tin un entrada, relativamente, limita tambe.
Tambe nan a menciona cu mester concientiza pueblo pa move mas, pa haci mas ehercicio y pa hiba un bida mas saludable.
