Den e temporada fin di April, Mei y te hasta comienso di Juni alumnonan di klas 3 di schoolnan catolico na Aruba ta celebra nan Prome Santa Comunion.
Esaki ta bin despues di un preparacion spiritual largo cu esfuerso di maestronan di school, Laiconan y Pastoornan Catolico.
Awe dia ta un mester cu e mucha mester atende celebracion di Santa Sacrificio di misa pa algun siman. Hasta Pastoor of su representante tin cu firma e mucha su atendencia na Misa.
Pero con e celebracion di Prome Comunion tabata antes na Aruba?
Ta cuminsa pa menciona cu cada parokia y school ta haci e celebracion di e dia di Prome Santa Comunion diferente. Tin school tabata tin procesion otro school mester yega sinta den misa.
E mucha y su preparacion
Den e Aruba di antes e mucha ta haya su preparacion den klas 2. E lesnan di Catasashi ta duna pa Frere of Souer di tempo ey.
Pero atrobe no tur mucha tabata bai school e temponan ey. Pero na edad di 7 of 8 aña mester recibi. Tin ora Pastoornan mes ta pasa den bario y tuma nomber di e muchanan.
E tempo ey un siman prome cu e fecha di ricibi e Prome Santa Comunion tur mucha cu edad 7 of 8 aña tin cu bai e ensayo general na misa di nan parokia Pero atrobe no tur mucha ta asina disciplina y sa con pa para den rij. Na Savaneta tabata tin un pastor cu tabata duna e muchanan un webo pa tene bao nan cachete. Esaki ta pa e muchanan tene nan cabes recht y evita di wak rond. Mas cu claro sinta keto. Na comienso ta hopi webo a kibra pa falta di disciplina.
E temponan ey e mucha ta ricibi mainta y ta renoba e mes un atardi. Desde aña 1966 esaki no ta asina mas.
E ricibimento mes di e Santa Hostia ta tuma lugar ariba lenga y no den man manera awor. Tambe ta hinca rudia pa recibi e Santa Hostia.
Te ainda bo ta haya hopi hende di edad cu ta ricibi ariba lenga y ariba rudia.
Na aña 1972 a cuminsa cu e ricibimento di e muchanan ta tuma lugar den e di tres klas. Poco poco tur school a cuminsa adopta esaki. E promer biaha cu esaki a sosode tabata na school di Pos Chikito.
E vestuario di e mucha muher ta un shimis blanco yena cu carcas y cu e wal dilanti cara. Hopi biaha ta un shimis cosi pa un cosedo y no shimis stranhero.
Shimis Stranhero kiermen cumpra na un tienda.
E shimis, sapato y cualkier prenda ta e Pepe, madrina di bautismo ta cumpra pa su iha.
Si e situacion ta malo financieramente e mucha muher lo bistir shimis di ricibimento di prima of ruman grandi. Esaki tabata masha normal den e temporada ey.
E mucha hombernan ta bisti bachi, camisa y dashi, hopi biaha cosi pa un sneiro. Na man robes ta bisti un sluier den forma di cruz.
Esaki ta e padrino di bautismo ta saca cara y bisti su sobrino.
Tin parokia tabata exigi pa e mucha tin un rosario den su man ora di ricibi. Esaki ta conta tambe pa e handschoen blanco. Atrobe cada temporada ta diferente.
E muchanan ta usa e mes un pana cu a ricibi mainta pa renoba nan fe atardi.
Preparacion na cas
Den temponan pasa no tabata tin mucho placa. Despues di ricibi comunion den misa ta bai cas. Ya lo ta merdia y mester tin un brindis y comemento di sopi di bestia chikito cu pan bati. Esaki ta special pa e pepe cu e omo di bautismo y mas cu claro e famianan di mas cerca.
Nunca sa falta e rom y jenever pa e cabayeronan y pa e damanan un ponche crema of cucui.
Mas den e tempo un tiki mas moderno e ricibimento di e muchanan ta bai acompaña pa fiestanan grandi cu banda of Caha di Orgel na cas, cu bolo di piso y bolo den forma di Buki di Bijbel. Tambe ta traha bolo preto y recuerdo. Tin hende tabata hasta manda traha recuerdo di fiesta na Venezuela. Mas cu claro e caha di bolo blanco casi no por sera pa tur e cosnan dushi cu tin den e caha.
Semper e cabes di bolo ta bay pa e pepe di e mucha y mas cu claro e padrino tambe ta haya un bon pida bolo pa hiba cas.
Cada cas of cada famia tabata tin nan forma con pa celebra e prome Santa Comunion di nan yiunan y mas cu claro e forsa financiero.
Den e ultimo añanan hopi famia ta escohe pa bay un almuerzo cu famianan mas cerca na un restaurant.
Esaki kisas lo a sali mas barata cu un fiesta.
(Abo ta corda bo prome Santa Comunion?, conta nos kico abo a experencia e tempo ey)
Compila pa Roberto Croes
