Solange Tchong, PR di AZV, ta splica:
ORANJESTAD (AAN) Den entrevista cu e Relacionista Publico di AZV, Solange Tchong, el a duna di conoce cu actualmente, no tin lista di spera.
Aworaki no tin casonan cu mester wordo procesa of cu ta riba un lista. “Pero loke mi por splica si, ta cu pa añanan nos ta wak cu mester corda cu e ta un trayecto, den e sentido cu nos tin un proceso mara na esaki. Pashentnan cu a sali pa haya tratamento den exterior y bin bek, tin cu corda cu na yegada ta bon pa tuma contacto cu nan specialista na Aruba, kiermen, minimo pa bo tin un consulta bek cu bo specialista akinan, pa pon’e na haltura di tur loke a tuma lugar. Generalmente, esaki ta sosode durante di bo tratamento na Colombia, pasobra tanto AZV como e specialistanan na Aruba ta den contacto cu e specialistanan cu ta trata bo na Colombia, pero tambe ta importante pa a cu ora bo yega na Aruba bek, nos tin cu bay wak kico e ley di AZV ta defini”, Solange Tchong a comenta.
Solange Tchong a indica cu e ley ta bisa cu tur tratamento cu tuma lugar na Aruba, tin cu sosode na Aruba. “Pues, bo ta bay wak cu na momento cu e pashent bin bek, si ta medicamente necesario pa mand’e di nobo na Colombia of si e por wordo trata na Aruba”, Tchong a señala.
Na momento cu e specialista na Aruba conclui bek cu e pashent por wordo atendi na Aruba, esey kiermen cu e cuido despues por tuma lugar aki mes, esey lo sosode asina.
“Y na momento cu conclui cu tin cu haci un peticion di nobo, pasobra enberdad bo tin cu sali bek pa Colombia, pa haya tratamento, e ora ey, e specialista ey mes, ta esun encarga pa haci e peticion di nobo. Esaki ta un proceso den e sentido cu e pashent mester por percura pa na momento cu e yega bek for di e tratamento, tuma contacto di biaha cu e specialista na Aruba”, Solange Tchong a reitera.
El a subraya cu di eynan ta bay evalua di nobo si enberdad e pashent cu bay bek, por ehemplo pa un control. Pakico? “Pasobra tin ora tin cierto controlnan of cierto cuido cu bo por haya gewoon, pero na Aruba. E ora ey no ta necesario pa sali bek”, PR di AZV a señala.
