Comentario: Pa Mercedes Monge
Cu conocemento di causa mi a dicidi di trece e tema di termento (bullying) cu tin den e scolnan na Aruba, y vooral den scolnan MAVO.
Ta trata di un problema serio cu, manera mi mes por a constata, no tur scol ta trate na un manera eficiente, mientras cu tin un ofensor y un ofendi. E mucha ofendi bon por bisa “ta bira desampara” den man di un alumno cu ta deal cu e resto di e klas, y alomenos un grupito ta participa den e mal actitud.
No por ta asina cu si tin un problema entre dos alumno, unda ta surgi mensahenan di amenaza di maltrato fisico, un maestra y un cabesante no ta imparcial y trece tur e alumnonan envolvi dilanti cu nan mayornan, pa purba resolve e problema pero ta scucha solamente banda di medaya di e alumno (nan) agresor? Ta parce cu tin cabesante cu tin miedo di confronta e situacion, cu no ta presenta un ni dos bez na scol, pero diferente biaha aña aden aña afo. Ainda por corda di e alumna di un scol MAVO cu otro dos a agredi fisicamente te cu el a para na hospital.
No por generaliza si, pasobra si tin un par di scol unda e director ta coi e toro pa su cacho mesora, y cu no ta permiti ningun tipo di ofensa ni mucho menos amenaza meymey di su alumnonan, ta tuma medida, ta yama tur partido envolvi incluyendo mayornan, y unda ta necesario hasta por expulsa e agresor (nan). Den otro scolnan, simplemente pa negligencia of simpatia cu e alumnonan ofensor, e situacion ta bay for di man, afectando e victima y sin duda su mayornan.
No ta un ni dos caso a yega te nos mesa di redaccion, pero ta varios caso unda e mayornan ta sinti cu nan yiu no a wordo scucha, yuda, ni atendi y tin cu hasta mester a laga scol.
Si tin trahadornan social pa scol, di con nan no ta wordo yama pa interveni? Si tur medaya tin dos banda, di con ta un banda di medaya so ta wordo tuma na cuenta, y precisamente esun di e parte ofensor? Termento (bullying) ta afecta un hoben di hopi manera, no solamente emocionalmente, pero ta kibra su concentracion durante les y durante tentamen, ademas cu si no busca ayudo profesional pa e alumno (psicologo) e por caba cu e mucha su amor propio. Sin duda e hoben cu tin mala fe pa otro y ta busca liderazgo door di mustra “tof” mester tin un problema serio cune, y esey tambe ta algo cu scol mester check pasobra e mester di yudanza, prome cu traspasa e limitenan di su conducta.
Ohala Minister di Enseñanza por duna oido y pone atencion na e asunto aki, cu no ta algo pa haci wega cune!
