Diego de Cuba di Sindicato STA:
*Trahadornan contento lo produci mas hopi
ORANJESTAD (AAN): Diego de Cuba, Presidente di Sindicato STA a trece dilanti cu hopi biaha e problema grandi na Aruba no ta cu e prijsnan ta keda subi. "Loke ta pasa ta cu e salarionan no ta keda subi paralelo cu e prijsnan. Eynan ta caminda cu e clase trahador ta haya su mes den problema".
E clase trahador ta e consumidor y e ta esun cu ta genera placa mediante su salario cu e ta cobra pa luna of quincena. Pero si tur cos keda subi, anto salario ta keda eybao, e ta bay confronta su mes cu problema, de Cuba a enfatisa .
E ta di opinion cu mester studia un sistema caminda cu por ehempel, un compania cu 25 trahador, coy 5 salario di 5 trahador cu tin cu manda nan cas cu un pakete of hinca nan otro caminda y haci e compania mas productivo, pero subi e salarionan di e resto di trahadornan.
Ta bay haya kisas un situacion caminda e trahadornan ta bay traha mas duro, nan ta bira mas productivo, pero nan tin mas entrada. "Pasobra si bo tin 50 trahador cu minimumloon, anto en bes di 50 trahador cu minimumloon bo tin 40 trahador cu un entrada di 3 mil florin pa luna, e trahadornan ey ta traha mas contento y nan lo produci mas hopi", a expresa.
Tur compania mester studia esaki, pero no ta cuestion di manda hende cas ya cu esey no ta prudente tampoco. Mester ta algo cu mester wordo studia, principalmente di parti di Departamento di Labor den e direccion aki. Controlnan cu mester wordo hiba riba e pais aki, lamentablemente mester bisa cu "e ta co'i yora".
E asunto aki a wordo treci dilanti no un biaha, pero varios biaha, Diego de Cuba a declara.
