Incertidumbre pa futuro ta exigi mas informacion di gremionan
*Con e Arubiano mester prepara den situacion caotico actual?
*Con economia di Aruba y e resultado pa Arubiano por sufri?
ORANJESTAD(AAN)—Uno di e problemanan mas grandi cu e ser humano tin, ta expresa su falta di conocemento di cierto situacionnan y topico.
Sigur den un epoca cu tur hende kier hunga sabi, hende ta prefera di crea teorianan cu e mes ta inventa a base di sucesonan.
Despues di Covid-19 a duna prueba con den un rato tur normalidad por wordo destrui, e actual situacion di guera tin mucho mas preocupacion, cu hende kier expresa.
DIARIO den e ultimo dianan aki, a confronta e preguntanan di publico den e silencio di guera.
Mester papia di silencio mundial riba topiconan importante pa hende, cu cada seconde ta wordo confronta cu otro paso concreto den un conflicto cu ya ta existi.
Cada rato mundo ta wordo confronta cu un formacion di dos grupo cu ta enfrenta otro den un crisis mundial cu expresionnan directo di dirigentenan internacional, cu e bom por rementa cualkier momento.
“Con un hende mester prepara?”
Pregunta di hende cu mester di informacion y hasta ta cuminsa pensa si e mester uza e preparacionnan pa horcan pa e peligro di un guera mundial.
E conflicto na Medio Oriente a rementa na momento cu mundo ta mira confrontacion creciente cu ta basa tambe directamente riba poderio economico y financiero cu ta marca aliansanan den e recuperacion mundial di Covid-19 pero tambe e forma cu mundo mester sigui gira ora petroleo no por produci placa mas.
Nos no ta bay leu y ta keda un rato na Hulanda cu ta puntra su mes si mester stop produccion di petroleo na Noordzee of aunke ta papia di cambio di clima, mester sigui cu proyectonan cu ta costo Biyones.
Mundo ta den un turbulencia total cu un prijs di petroleo cu ta subi y baha mientras inseguridad di hende, ta baha y sigui baha.
Con Pueblo di Aruba mester posiciona su mes actualmente?
DIARIO a atende cu personanan cu kier prepara na tur forma pa problemanan serio cu por presenta pero no ta mira e peligro cu nan kier viaha pa destinacionnan den exterior pa pasa nan dianan di fiesta manera nan a planea.
Kico esaki por encera y kico nan lo mester haci si un problema mas grandi surgi durante nan estadia den exterior, no ta wordo menciona.
Informacion mester alcansa Pueblo cu ta biba cada momento cu desaroyonan tuma lugar y na momento cu e haya un oportunidad ta lansa pregunta serio.
No mester lubida cu e pandemia di Covid-19 a entrega mundo e prueba di fragilidad enfrente desaroyonann inespera.
Mundo ta bolbe na un epoca di pasado, den cual miedo a influencia turismo y henter economia mundial grandemente.
Sin crea panico cu no ta necesario pa Aruba, tur sector na Aruba mester bini dilanti sin presenta nan opinion personal riba loke ta pasa pero si cu splicacion pa e Arubiano riba tur tereno.
Informacion cu barconan lo por ta den problema na cierto parti di mundo, ta crea den silencio di publico e impresion, cu problema pa comercio den cuminda, a presenta su mes. DIARIO a ricibi preguntanan riba e tereno aki y mucho mas di personanan cu no ta conoce cu e proceso kico nan mester haci si acaso nan ta den exterior ora un problema surgi.
Un conflicto mundial ta den desaroyo serio ya cu hopi conflicto cu ya tabata existi na tur parti di mundo, awor ta haya expresion den e creacion di confrontacion.
Publico mester ricibi informacion kico e resultadonan por ta y aki gremionan tin un deber importante pa asina como Pueblo Aruba por enfrenta otro reto di destino na momento cu a pensa cu despues di Covid-19 mundo lo por a sigui cana sin problema rumbo pa un mundo nobo, caminda e e menasa mas grandi cu a compaña hende for di fin di Segunda Guera Mundial continuamente ta bini dilanti den declaracionnan di lidernan mundial cu ta confronta otro.
Mester informa Aruba cu tambe por uza e momentonan aki, pa entrega na mundo e sentido di paz cu Aruba por brinda na hende!
