Cu mayoria di 12-8 den Parlamento, AVP no a mira avestruz?
- Con Benny a logra secrecia total di Avestuz den neishi di e parha?
- Mayoria di Parlamento di AVP a entrega Mike y Benny 1.6 Biyon
ORANJESTAD (AAN) Na un momento cu Aruba mester di tur su capacidad y energia pa traha riba su futuro den un situacion mundial dramatico, e caso Avestruz ta keda e topico mas importante den comunidad di Aruba.
Na e momento cu e caso a haya su inicio, a wordo mustra di parti di autoridad criminal di Aruba, cu e caso aki ta importante, pasobra ta trata di asuntonan di tereno, cu tanto Arubiano ta anhela di tin pa nan por construi nan propio cas.
Pues aki ta trata di un asunto sumamente serio pasobra manera Huez den Prome Instancia a conclui, tin motibo pa manda Benny Sevinger prison, aunke e sentencia di Huez a topa cu apelacion mientras Benny Sevinger hasta a keda den Parlamento.
Y aki ta caminda e rabo di porco ta krul pa DIARIO, manera semper nos a trece dilanti.
E caso Avestruz ta uno sumamente serio, pasobra no uno pero dos Gobierno di Mike Eman, for di 2009 a cumpra curazon di votadornan na un forma abrumador.
E ta e dos Gobiernonan aki tabata sede di Benny Sevinger, cu den sala di Corte di Husticia a wordo presenta den e acusacion, como e haraña den e neishi di Avestruz, e parha cu no ta dera su cabez den santo, pero ta come di e forma aki.
Di kico e caso Avestruz ta consisti? Di acusadonan cu bon relacion cu otro, pero tambe uni den e partido AVP, di cual e dirigente tabata Mike Eman, cu practicamente a percura pa estado di bancarota di Aruba.
Hulanda a interveni den e maneho financiero di Mike Eman, cu entre otro a bini cu e proyectonan PPP, cu tambe ta un misterio si tene na consideracion, cu Gobierno Mike Eman a trapa cu dos pia riba Ley di Contabilidad, cu ta bisa con mester atende cu placa di Pueblo.
Mike Eman como lider di partido AVP, a percura pa te awe Pueblo di Aruba paga salario pa Benny Sevinger den Parlamento, caminda Benny Sevinger tin tur e beneficionan cu e ciudadano cu ta paga belasting no conoce.
E caso di avestruz ta mucho mas serio cu solamente un caso den cual ta atende cu un persona, acusa di criminalidad.
Ora tuma nota di e fecha, por nota cu Pueblo a duna su voto di confiansa na Mike Eman, algun luna prome cu Hulanda a baha Mike Eman for di Fort Zoutman y a exigi cambio den gobernacion di Aruba, cu te awe a keda bou supervision.
Ta na e momentonan aki, ora leza e relatonan di Corte, e Avestruz lo tabata come cabez na suela, den casonan cu a haci cu Benny Sevinger a wordo castiga na estadia den prison, pero no a bay prison, pero a keda den Parlamento di Aruba, caminda e tin un salario cu Pueblo di Aruba ta paga mescos cu tur su otro gastonan como representante di Aruba.
Nos pregunta ta keda, kico e partido AVP a haci cu e responsabilidad di Parlamento cu tin como tarea mas importante pa percura pa abuso no wordo haci di placa d Pueblo?
Kico a pasa den seno di AVP, caminda durante dos gobierno di Mike Eman, casonan condena como criminalidad dor di Huez, a tuma lugar?
Mike Eman, cu hunto cu Benny Sevinger a percura pa e bolo di 1.6 Biyon di proyectonan PPS y e debe nacional cu ta stroba Aruba biba, a exigi pa Benny Sevinger keda den Parlamento y hasta bay eleccion den un campaña den cual abiertamente AVP a pidi su votadornan pa vota pa Benny Sevinger.
E caso Avestruz ta papia di un democracia cu no ta existi. E ta papia di kiebra di e alma di un estado di derecho.
Na e momento cu caso Avestruz tabata desaroya den partido AVP, e partido a logra un victoria aplastante electoral na Aruba, debi sigur na e propaganda cu e por a haci prome cu eleccion.
Awe Aruba como estado di derecho ta den Corte Superior den e caso di Avestruz, cu a bati alarma grandi pa e buraconan grandi den gobernacion democratico, manera e resultadonan di Gobierno Eman cu integrantenan manda prison y un debe nacional pa Pueblo paga, ta forma base pa pensamento publico.
