Un scandal sexual ta rementa atrobe den e paraiso di fantasia humano
*Un viaje pa e mundo secreto di lagrima, streanan y mente briyante
*Despues di Polanski awor Weinstein como productor dilanti Huez
ORANJESTAD(AAN)—Na Siglo 20 industria cinematografico, a basa su mes riba produccion di peliculanan cu a nace for di pasashinan biblico, cu a bira e obranan mas gigantesco cu mundo a conoce.
E suspenso den e pelicula tabata enorme, ora e actor Charlton Heston ta enfrenta e Laman Cora, cu e mester ordena pa habri, mientras e ta wordo persigui pa e tropanan di Pharaoh, representa pa Yul Brynner.
E secreto di e pelicula “Diez Mandamento” a bira despues un atraccion turistico na Hollywood, caminda Laman Cora a sigui habri y cera continuamente pa turistanan admira.
Den un container basta chikito yena cu awa, gelatina a e produci e olanan cu a keda para y asina wordo filma.
Algo simpel pero cu a costa tanto placa pa inventa pero tambe ta ilustra e costo di produccion di pelicula, cu mester bira un negoshi.
Un mundo di magia di pelicula, ta haya otro perspectiva ora di acerca haya oportunidad pa revisa tur elemento presente di e poder di magia di pelicula.
Por ehempel, despues di e exitonan financiero di peliculanan biblico, ta topa cu e era den cual Mia Farrrow a presenta e horor di Rosemary’s Baby y mundo a cera conoci cu e momento cu e director Roman Polanski, a wordo acusa di violacion sexual di victima hoben.
Cuanto placa ta circula den e mundo di produccion di pelicula? Tin e parti pues di produccion cu computer a haci mas facil, pero tambe tin necesidad pa un bon maneho administrativo cu por ehempel, hasta un hotel of Gobierno, por considera como peligroso y cu necesidad di maximo prevencion di fayo.
E pelicula mester wordo bendi rond mundo y asina mester di maestronan den e arte di promocion cu ta parti di e empresanan cu paga capital na personal profesional riba tur tereno y sigur e parti huridico.
Mester di artista, cu no semper tin e caranan bunita cu ta mira riba pantaya pero si e capacidad pa hunga un papel den e mundo di fantasia y exigencia sumamente pisa pa un ser humano.
E hecho cu un hende ta bira popular y conoci ta atrae hopi persona, cu mester pone nan mes den man di e ehecutivonan cu ta bira manera un dios pasobra nan tin den nan man, e posibilidad pa haci un persona conoci den un rato, pero tambe pa pone un fin na loke e hende a alcansa.
Sector di pelicula ta uno di pilarnan financiero mas grandi na mundo, cu hopi bez participacion directo den otro ramonan decisivo pa capital, cu ta circula.
E realidad di artistanan grandi, hopi biaha no ta comprendibel pa publico, cu no ta mira con tras di cortina, e artista ta victima di exigencianan sumamente pisa.
Un fayo di e artista por paralisa e produccion, cu por ta costoso. Na mes momento e doñonan di placa, cu no ta gasta placa pa loco manera e trahador comun, den cierto casonan cu a bini dilanti Mesa Berde, ta keda presenta como acusado di abuso sexual pa exigencianan personal enfrente artista homber y muher.
Na e momentonan aki, na New York un caso grandi a desaroya den Corte di Husticia na momento cu a wordo anuncia, cu Corte di Husticia a scrap e sentencia contra Harvey Weinstein, productor di pelicula, cu a wordo acusa di violacion sexual.
El a sali liber pasobra segun Corte, den e caso a presenta tambe testigonan cu no tabata tin relacion directo cu e caso mes, den cual un cantidad record di dama a papia di abuso sexual cu mester soporta.
Na 2020 el a wordo condena na un castigo di prison di 23 aña pa violacion y abuso sexual di dos actriz. Despues di esaki, un ehercito di hende muher di Hollywood a presenta acusacion pa su actuacion sexual abusivo.
Liber e no por considera su mes pasobra na Los Angeles, ainda e productor di pelicula mester atende cu su castigo di 16 aña di prison pa su violacion.
Weinstein ta uno di e productornan poderoso di Hollywood, caminda e mundo di fantasia di pelicula, den un rato por cambia e bida real di un persona, manera nos a splica.
E relatonan cu ta nace for di e prijs cu fama ta exigi di un persona, hopi bez no ta haya atencion na mundo, cu ta glorifica e ambiente di artista cu nan no conoce.
Realidad di Hollywood y e mundo real di artista ta, cu e ta capaz pa destrui tur balor di hende, pa kende hende famoso na e mundo aki, ta bira manera un dios, cu tin destino di otronan den nan man.
