Dia Global pa Brasa bo Yiu
ORANJESTAD (AAN): Dialuna 21 di juli ta Dia Global pa Brasa bo Yiu. Un dia dedica na encurasha hende, di un manera hopi simpel pero profundo, pa kita for di e stress di bida, kita for di telefon, y habri brasa pa un di e regalonan mas poderoso cu un mayor por duna: un brasa.
Un brasa por parce algo simpel. Pero den un mundo cu ta move sin para, un brasa no ta simplemente un gesto. E ta un anker. Un sanacion. Un idioma di amor cu ta bay mas profundo cu palabra.
E fecha aki, Dia Global pa Brasa bo Yiu, a nace na aña 2008, door di e dolor di Michelle Nichols, un mama cu a perde su yiu di 8 aña pa motibo di un tumor den celebro. E dia ta ser celebra e di tres dialuna di juli y su meta ta simple: lanta un ola di amor pa yiunan via e gesto mas basico pero mas necesario: un brasa.
Den un dia di desordo, trabou, social media y mil di cos pendiente, hopi biaha hende ta lubida di para keto y brasa yiunan—conscientemente. Pero yiunan no ta solamente un responsabilidad. Nan ta un bendicion. Un regalo sagrado. Dios a confia nan cu mayornan pa un temporada. Nan ta wak e manera con mayornan ta trata nan cu amor. No solamente kico e mayor ta duna, pero con e ta siña nan kico amor ta. Un brasa ta bisa sin palabra: "Bo ta suficiente. Aki. Aworaki. Manera bo ta."
Estudionan ta mustra cu un brasa di 20 seconde por baha stress, yuda cu e sistema inmunologico, reduci ansiedad, y crea un lazo emocional fuerte. Pero mas importante ainda: un brasa ta crea recuerdo. Y e tipo di recuerdo cu ta dura un bida largo. Un dia bo lo no tey. Pero bo yiu lo recorda kico bo a laga den su curason. No solamente reglanan y "cos cu mester haci." Pero e luga sigur den bo brasa. Laga esey ta bo legado.
Hopi hende grandi ta cana cu dolor pa motibo di e falta di afecto durante nan niñes: ora nan tawata tristo pero ta ser bisa pa nan no yora. Ora nan tawata cu miedo, pero a ser forsa pa “ta fuerte.” Awe ta bo oportunidad pa kibra e cadenanan aki. Pa siña cu amor ta incondicional. Un brasa no ta un premio. E ta un necesidad.
No ta solamente e mas chikitonan mester brasa. Hobennan tambe. Esnan cu ta cana cu cara rabia, cu ta dal porta cera, of ta pone actitud—nan ta pidi un brasa, sin palabra. Nan ta pidi pa bo no bandona nan emocionalmente. E brasa ta bisa: “Mi ta aki. Tur ora.”
Brasa bo yiu awe. No pasobra ta Dia Global pa Brasa bo Yiu. Bras’e pasobra bo por. Pasobra mañan, no ta garantisa. Pasobra tempo ta pasa sin compasion. Laga bo brasanan ta un refugio. Laga bo amor ta nan fundeshi. Sea pa baha stress, fortalece laso, of simplemente pa siña amor, e fecha aki ta un recordatorio: Brasa bo yiu. Y haci di esey un habito sagrado.
