Loke mester spera di un gobernante sigur a wordo ilustra
*Mundo ta contesta un pregunta cu politica na Aruba a ignora!
ORANJESTAD(AAN)—Durante ultimo siman, den tur e problemanan cu mundo conoce, un simpel portret cu Princesa Kate di Inglatera a manda pa medionan di publicidad, a haya resultadonan cu a laga hopi hende sorprendi.
Pa ta sincero, nos mes a puntra nos mes, si ta na su lugar pa ainda papia di loke hende por drecha na un portret oficial cu ta wordo publica, por tin tanto resultado pa e persona envolvi.
Finalmente den e palabranan “noblesse oblige”(noblesa ta obliga) ta sconde e realidad, cu ta bati tambe na porta di Aruba, cu a wordo haci ridiculo dor di un acto di su Prome Ministro, cu a drenta huelga di hamber.
Loke a pasa algun dia pasa, sigur mester haya atencion di tur periodista, pasobra manera nos mes a admiti, e realidad cu a wordo presenta, no a conoce e balor cu e merece.
Pa cuminsa nos ta kere, cu e loke a pasa cu Princesa Kate, ta habri wowo di tur hende ku ta entrega foto pa publicidad cu mester ta autentico, mester ta real.
Esaki ta e punto cu a bini dilanti, aunke na un forma inespera pa nos tur, cu tin e deber pa mira si na Aruba, publico no a wordo confronta cu loke no ta aceptabel di figuranan publico.
Ora nos revisa si den historia di Aruba tin un situacion cu por wordo pone den e cuadro di loke a pasa cu e foto di Princesa Kate, cu a drecha un imagen, nos ta mira nos dilanti e comedia mas horibel cu mundo politico di Aruba a wordo presenta cu ta e huelga di hamber di Mike Eman cu resultadonan directo pa e opinion di publico di Aruba.
Den e caso di Mike Eman, un Prome Ministro di Aruba, a dicidi cu, pasobra Hulanda a haci uzo di Statuut pa defende e bienestar financiero di Aruba, e por a crea un situacion den cual el a uza e sentimento humano di e Pueblo di Aruba mescos cu recursonan oficial di e Arubiano, pa crea e drama di su huelga di hamber.
Ora analisa loke a pasa y pone esaki contra loke ta pasa cu Princesa Kate mundialmente pasobra el a “photoshop”un portret, nos ta puntra nos mes, con por a permiti Mike Eman sin mas keda activo den mundo politico.
Mike Eman a uza e recursonan esencial di Pueblo, manera servicionan di Salud Publico. Cuanto problema un Arubiano por tin pa ambulance por yega na e lugar cu e mester di auxilio si e ta den problema?
Mike a uza servicio di ambulance, Cuerpo di Polis y a paralisa bida di tur dia na Aruba pa el a presenta su show den Fort Zoutman y despues wordo baha dor di Ministro di Reino, Ronald Plasterk, pa enfrenta e maneho desastro di Mike Eman cu placa di Aruba.
Kico a pasa despues? Nada! E portretnan ta papia di publico enorme, di Pueblo cu a wordo alarma pa un caso, den cual Mike Eman simpelmente mester a responde pa e maneho cu el a hiba y te awe ta motibo cu Aruba mester paga e debe, cu ta stroba Aruba di disfruta di loke el a logra.
E suceso cu Princesa Kate, cu a photoshop un potret sin prueba cu el a cambia ni su cara of di su yiunan riba e portret, a haci cu e Princesa a disculpa su mes na mundo.
E huelga di hamber di Mike Eman, cu a uza loke como Prome Ministro di e pais, e posibilidadnan cu el a ricibi den su funcion, te awe no a ricibi e disculpa di Mike Eman, cu a laga preguntanan serio atras riba e seriedad legal cu un gobernante mester tin na Aruba y e imagen di Aruba cu e ta crea den henter mundo!
