Proximo paso ta cu un mucha di cinco aña ta drenta Parlamento?
*Benny ta mas cu e Arubiano cu mester biba cu resultado di crimen?
*Ley ta considera AVP fuente di tur scandal produci pa su politiconan
ORANJESTAD (AAN) — Persecucion di crimen ta un deber asina sagrado na Aruba, cu e pais mester paga un Cuerpo di Polis pa ehecuta e deber di Ministerio Publico pa Husticia bira realidad den e exigencianan pa mantencion di orden den comunidad.
Ora un pais no conoce orden y bira un republica di banana, democracia ta muri pasobra e ciudadanonan cu mas forsa pa cualkier motibo, por trapa riba esun mas debil y deshaci di tur su derechonan. Esaki ta nifica cu un hoben por strangula un anciano, sin wordo castiga. E ta nifica cu un ladron pa horta e cartera di un ciudadano. E ta nifica cu esun cu no tin un arma pa defende su mes of no sa con ta usa un arma, ta bira victima di criminal. E ta nifica cu e ciudadano, cu no conoce ley ni su interpretacion y ta confia den politiconan, ta bira victima di abuso politico.
Pakico den un crisis mundial tur atencion di Aruba ta dirigi riba Benny Sevinger, cu segun sentencia di Huez a haci su mes culpabel na corupcion?
Pasobra e ta Miembro di AVP, un partido politico cu mester ta ehempel pa moral di Pueblo pero atrobe ta busca tur forma pa defende loke a pasa.
Ta increibel cu un grupo cu ta yama su mes intelectual, no ta mira kico nan haci cu e base moral di Aruba dor di hasta comberti Benny Sevinger den un split unit, cu no a haci nada segun nan como Ministro pero como ciudadano.
Como partido politico di Aruba, AVP no mester mira con e ta tene Benny Sevinger den Parlamento, cu ya a wordo humilia cu presencia di un acusado. Ningun momento e estadia di Benny Sevinger den Parlamento mester a bira discusion despues cu Huez a condena Benny Sevinger na castigo di prison.
Benny a apela su condena. Pero no tin ningun veredicto di Corte di Husticia ainda, pa bay contra sentencia di un Huez, cu no solamente a condena Benny (como ministro of como persona of kico cu e kier tabata na e momento).
Huez a condena e ciudano Benny Sevinger, mescos cu Huez a condena Pablito, Pedrito y tur Arubiano cu no tin e suerte di ta pertenece na e mundo di encanto di AVP.
Mike Eman ta e ultimo persona pa papia, despues cu el a destrui Aruba cu su maneho financiero y despues cu el a permiti Nicolas Maduro hinca speransa falso di un refineria cu a trece hasta personanan cu husticia internacional tabata busca, Aruba.
Mike Eman hunto cu Benny Sevinger a hinca Aruba den e debe cu a sigui crece di proyectonan Bo Aruba cu te awe den hopi caso a wordo otorga na cantidad di instancia, a permiti “contratistanan” eligi gana placa, cu awe Pueblo di Aruba mester produci.
Aruba a perde su credibilidad como pais autonomo cu por goberna su mes, ora Mike Eman a percura pa Hulanda pone Aruba bou supervision y Mike a desaparece ora Pueblo di Aruba a deshaci di su mayoria absoluto den Parlamento.
Kico Ley ta bisa? Esaki Mike mester splica e Pueblo di Aruba su si mester biba cu Ley y mester paga belasting pa paga Miembronan di Parlamento, cu ta traha den servicio di Pueblo di Aruba.
Parlamento y Gobierno di Aruba no ta cas comercial di AVP, cu ta pone Ley na prueba pa un persona cu Huez a condena, haya un oportunidad pa keda representante di Pueblo di Aruba, cu tin moral como su bandera.
Pakico no ta bay exigi pa Pedrito y Pablito no keda sin trabou pasobra Huez a sentencia nan na castigo di prison y a cera porta di trabou pa nan?
Pakico Pueblo si mester sigui paga Benny Sevinger, cu pa Ley ta representa AVP directamente pasobra sin lista di AVP e no por a wordo eligi na forma forzoso pa Parlamento.
Tur loke ta resta ta, cu AVP ta exigi cu mucha di cinco aña tambe por bira Miembro di Parlamento of Gobernante. Ley ta regla tambe e edad pa un persona ta den Parlamento y Gobierno pasobra Ley ta pone orden den e cas Aruba.
Con importante Benny Sevinger ta pa AVP y pakico, ta e pregunta cu ta keda atras na e pio momentonan di democracia, cu ta e vehiculo politico di Aruba.
Loke AVP mester splica Pueblo ta cu na momento cu a condena Benny Sevinger, a condena AVP cu ta e partido cu a haci posibel pa e por participa na eleccion y bira representante di e pais.
Si Benny a faya, AVP a faya segun e sistema legal!
