Caida artificial di prijs di petroleo por ta tiro di culata
*Pruebanan historico di surgimento di lidernan peligroso
*Negativismo enfrente 2023 ta trampolin peligroso pa recesion
ORANJESTAD(AAN)- Historia ta nace den mente humano.
Naturalmente tin fenomenonan natural cu hende no por contene. Hende, sinembargo, hasta por evita hopi desastre natural, si e uza su tempo y mente na forma positivo y pa yega na prevencion di problema.
Ora analisa historia, ta topa cu e realidad cu pa cada momento di caos, tabata tin un motibo cu a conduci na e hecho y e causa directo pa loke a pasa.
Na Hulandes tin un distincion cla di “aanleiding”, cu ta indica un proceso y e “oorzaak”, e causa impactante.
Ayera ta e mihor maestro ora nos kier trata na proyecta futuro pasobra historia ta ripiti.
Na final di September, mundo ta cuminsa despedi di 2022 pa drenta 2023.
Tres luna, cu pa tradicion ta mira hende ta traha inventario pa yega na plannan nobo. E tres lunanan aki ta sirbi pa cera un capitulo y habri otro.
2020 a duna prueba cu nos no por mira loke tin nos dilanti. Mundo tabata baila sin cu e tabata na haltura cu Covid-19 ya a haci su entrada secreto.
Sinembargo, na mes forma, situacionnan nobo cu ta duna animo, por presenta.
Riba tereno medico nos por yega na un remedi contra cancer.
Cu e situacion mundial ta hopi dificil, nos tur sa y DIARIO tin e tarea pa percura pa Pueblo di Aruba ta bon prepara riba tur tereno.
Pero mester mira tambe cu mester sigui fomenta animo y splica con hende mes a percura pa loke ta pasa awe.
Covid-19 a crea problema social, economico y financiero Pero no tabata e pandemia cu a provoca e guera di petroleo, cu for di 2021 a cuminsa subi prijs di petroleo.
Na 2022 por mira con hende mes a manipula cu prijs di petroleo cu produccion di azeta. Ora a baha produccion di petroleo, prijsnan a subi.
Awor prijs a baha pasobra a uza reservanan disponibel, cu ta baha na volumen. Ora reserva baha, mester bolbe na produccion y posibilidad grandi di aumento di prijs.
Hende ta dicidi, hende a haci.
Na e momentonan aki mundo conoce problemanan cruel. E costo di bida a subi y ta causa hamber y miseria.
Perspectivanan ta bisa cu na 2023, e crecemento economico mundial lo baha y ta papia di recesion, cu ta algo cu hende tin den su man tambe.
Na 2022 a subi y baha balor di moneda cu a saca e sistema mundial for di su orbita na hopi pais. Naturalmente esaki tin resultado pa economia mundial, cu ta depende di guera cu ta sostene e ramo economico di arma.
Ora nos observa e “Great Depression” na inicio di Siglo 20, nos ta topa cu e situacion di un Pueblo mundial amarga, defrauda, y e forma cu lidernan peligroso a surgi.
Si sigui desaryonan mundial, ta mira con lidernan nobo ta nace den un ambiente cu hende ta permiti su mes wordo hiba na decisionnan peligroso ora dicidi pa lidernan y nan maneho.
Durante e ultimo añanan, Aruba a lucha y a enfrenta retonan enorme. Aruba a sobrevivi.
Pakico? Pasobra Aruba no a biba a base di aventura pero a base di realidad, cu no ta un asunto facil ni awe ni den futuro.
Pero realidad ta e punto di salida di responsabilidad, cu cual nos ta dirigi planeta Tera.
Nos tin problemanan pa resolve na 2023. Nos mester adapta nos forma di bida. Pero ta esencial pa conta nos bendicionnan tambe como un Pueblo responsabel.
Fin di dia na Aruba, tabata nifica den pasado e admiracion di naturalesa ora solo ta baha y sin coriente, mester a prepara pa un dia nobo den sonido di paz, pero tambe den sonido di guera.
Awe mester prepara pa e reto di un 2023 dificil cu recesion y hasta menasa di guera, cu ta culminacion di loke hende a desea y crea ora nan dicidi pa lider iresponsabel y destructivo pa bienestar di e pais of lider cu por dirigi e pais den tormenta.
Noticianan cu lo bini dilanti den e proximo dianan aki lo papia di asuntonan serio y hasta fastioso pero tambe e retonan pa yega na solucion y camindanan nobo pa futuro.
