Directie Natuur en Milieu:
ORANJESTAD (AAN): E 𝐩𝐚𝐭𝐫𝐢𝐬𝐡𝐢 ta un parha shimaron cu ta prefera cana riba vloer cu bula den aire. Su nomber cientifico ta 𝒞𝑜𝓁𝒾𝓃𝓊𝓈 𝒸𝓇𝒾𝓈𝓉𝒶𝓉𝓊𝓈 y na Ingles nan ta yam’e Crested Bobwhite. E ta un especie di parha cu ta prefera un habitat natural cu matanan seco di clima tropical.
E patrishi adulto ta midi mas o menos 17 pa 21 centimeter largo. E patrishi macho y embra ta hopi similar den apariencia.
E plumashi di e macho ta den un tono mas cla cu esun di e embra. E tin plumashi largo na e parti dilanti di su cabes y su corona ta di color beige of blanco. Na e parti patras di su nek y resto di su curpa e patronchi di su plumanan ta den forma bloki bloki color blanco cu preto. Bou su garganta y pecho ta color bruin cora. Su wowo ta bruin, e piek ta preto y su pianan ta grof color shinishi scur.
Por haya grupo chikito di patrishi ta cana hunto riba tera band’i un area cu tin awa. E dieta di e patrishi ta consisti di blachi, invertebra chikito y tambe fruta di bushi.
E patrishi macho ta haci un zonido y por scucha nan den temporada di reproduccion. E patrishi ta pone su webonan den un neishi cu e ta traha cu takinan, e ta coba bou di un boshi yerba of bou un mata scondi.
E patrishi su populacion ta parce di ta bahando aki na Aruba pero na nivel internacional e ta stabiel. E parha aki tin un bario yama na su nomber, Sero Patrishi.
Credito di colaboracion di potret: @Aruba Birdlife Conservation
Fuente; Facebook Page Directie Natuur en Milieu
