Jair Britten, Presidente di Organizacion Pro Cunukero Arubano:
ORANJESTAD (AAN)-- Jair Britten, Presidente di e Organizacion Pro Cunukero Arubano, den un entrevista cu Matutino DIARIO, a referi na e proyecto “DCALPHA” den e mundo di agricultura di Aruba.
“DCALPHA ta un proyecto tremendo, cu pa cuminza, e ta inventariza tur e islanan chikito; sea cada pais, isla, y teritorionan chikito, por ehemplo Bonaire, Saba, Statius unda cu siguridad alimenticio ta keda un tema hopi halto. Nos ta mira tur disturbio y situacionnan geo-politico y diferente pais ta hopi tenso ainda, nos ta mira desasternan natural cerca di nos region y e vulnerabilidad di nos ta keda hopi halto”, segun Cunukero señor Jair Britten ta señala.
El a referi na e Conferencia DCALPHA, cu a tuma lugar na Mei 2026. El a señala cu un conferencia grandi asina ta trece e importancia den kico nos mester ancra nos mes, riba nos Isla.
“Esaki pa compronde y tene e tema aki hopi halto riba agenda pasobra no por keda haci wega mas. E parti importante di DCAlpha ta trece tur hende hunto y e situacion actual, unda nos ta para aworaki y kico nos mester pa sobrepasa; conoce tur nos puntonan debil, y di con nos no ta bay dilanti. Menciona tur e aspectonan manera e ta, pa nos por bay dilanti; inventariza. Logicamente bo tin e panel, tur e ministernan y gobernantenan, tur e organizacionnan internacional, y Reino y nan tin oido y akinan nos tin cu busca caminda pa soluciona e cosnan aki”, segun Jair Britten.
Pa loke ta trata Aruba mes, e aspecto mas importante ta cu mester yega na dialogo entre e islanan ABC. “Pesey nos no ta progresa. Manera nos a presenta na DCALPHA Aruba, nos a tuma iniciativa, nos a lanta para, y a mira con nan ta bin na cantidad cuantioso y nos riba veld, cu solo ta kima nos, ta cria nos bestianan; hendenan ta puntra nos di con, nos no ta bay mas grandi. Trece e mente bek na loke ta produccion artesanal, prome cu ta start bek na comercial”, Britten a señala.
El a bisa cu mester wak cuanto enemigo Aruba tin, y cu den 40 aña di Status Aparte ta hopi problema tin, pero tur hende ta bira mudo, pero e organizacion di Kunukero, cu caracter fuerte a lanta, a drecha esaki, y a haya sosten di tur e islanan y a traha un mocion y na momento cu tabata firmando e MOU nan a bisa cu nan tin voz y mester ta sinta na mesa, cu fondonan mester bin direct pa nan, y como parti igual den Reino mester tin subsidio y esaki mester bira un realidad pa ta igual den Reino.
