Minister Glenbert Croes:
ORANJESTAD (AAN) –Den conferencia di prensa di gobierno, Minister Glenbert Croes, titular di Labor, Energia y Integracion, a señala cu Aruba ta
den un momento crucial.
E mandatario a expresa cu Aruba tin un refineria cera, di cual un parti ta den bon condicion, y gobierno kier reactiv’e cu “clean technology”, energia limpi, no
a base di HFO sino a base di gas natural y miho.
E partinan cu no ta bon lo wordo reemplaza pa full e desaroyo di Aruba Hydrogen Valley. “Basicamente un Hydrogen Valley, ta un region designa, na unda tin
produccion di electricidad y di fuel limpi.
E ta diferente componentenan di inversion. E ta e produccion di e generacion di energia, e por ta via mulina di biento. Nan ta pone mulina di biento den tur caminda unda tin biento, y Aruba ta bendiciona cu hopi biento.
Biento ta un di e rikezanan natural”, e dignatario a bisa.
El a referi tambe na energia di fuente solar. Esta e solar panels. Tambe Aruba ta bendiciona cu hopi solo, cu tambe ta parti di Aruba su rikeza natural, minister di energia a remarca.
“Y loke mi ta yama den idioma crioyo, e refineria di hidrogeno, cu e ingenieronan yama e facilidad di produccion electrolysis cu ta basicamente e proceso, unda cu e awa ta wordo separa, e HFO ta wordo separa, e hidrogeno ta wordo produci”, el a señala.
Esey ta nifica cu ora un persona bay pomp su auto cu gasoline, e ora ey lo yena su tank cu hydrogen fuel. Tanto auto di famia, como pick up, bus, etc.
Esaki ta locual e proceso di educacion y concientizacion di nos comunidad, den e rumbo aki mester bay, pero tambe e comprension, y incentivonan.
Segun e mandatario, sector bancario mester compronde cu e famianan na Aruba, e hubentud, e comunidad mester wordo yuda y guia.
Gobierno ta asumi responsabilidad y duna incentivonan pa haci e transicion ey hunto cu mundo, hunto cu Aruba, pero e transicion aki no por ta uno di gobierno so, di e companianan di utilidad so, sino cu e mester ta un transicion, concientizacion y accion di tur pueblo como pais, como henter comunidad, tur hunto.
“Mescos cu nos ta exigi pa mundo actua, no por ta asina cu un parti di nos pueblo ta hacie y un parti no ta hacie. E transicion ey nos mester cane hunto”
Minister Glenbert Croes a remarca.
