Reconocemento di Brenchi Arends y Angel Botta mester ta inicio
*Ebby Arends ta representa motibo cu a sobrebibi salida di Lago
*E comerciante local mester haya mas atencion den historia Aruba
ORANJESTAD(AAN)—Con Aruba a sobrebibi salida di Lago? Na varios ocasion DIARIO a splica e e salida di Aruba for di uno di e crisisnan mas grandi den historia di Aruba, cu tabata e ciere di Lago.
E hecho cu semper e desaroyo di turismo ta wordo uza como e forma cu Aruba a logra pasa den e dianan mas scur den su historia moderno prome cu e pandemia Covid-19, ta stroba Aruba realisa con e union total di un Pueblo a bira e milagro grandi pa sigui cana den futuro.
Prome cu expansion rapido di turismo cu for di decada ochenta a habri portanan grandi pa economia di Aruba, e pais nobo por a sigui cana, a base di e forma cu comercio local a atende cu e pais.
Na e momento cu Aruba a duna honor na Brenchi Arends y Angel Botta, DIARIO a a haya un satisfaccion grandi pasobra poco atencion ta wordo dedica na e papel importante cu e comerciante Arubano ta hunga den bienestar di su pais.
Ora Lago a bay y Aruba a drenta den un estado di caos social realmente, Aruba por a conta cu su companianan propio, cu su comercio local, cu na tur forma a haci posibel, pa e pais por a sobrebibi y recupera e crisis grandi.
Tabata e comerciante Arubano y companianan internacional ya existente cu tabata parti di Aruba, cu a entrega e prome yudanza na Aruba pa sobrebibi loke ni Pandemia a haci cu Pueblo di Aruba.
No tabata tin tempo pa traha un plan social na momento cu Lago a dicidi cu e ta bay.
E Arubiano cu tabata prepara pa realisacion di su anhelo pa Status Aparte, a wordo sorprende pero a contesta como Arubiano cu a duna otro man pa sigui cana.
Ta na e momentonan aki, comercio di Aruba a entrega prueba na e Pueblo di Aruba di e importancia di e espirito Arubano di comparti cu otro na e momentonan mas importante.
Na e momento cu Ebby Arends a bini dilanti pa papia di su tata Brenchi Arends, nos a realisa cu tin un buraco den historia di Aruba cu mester splica con importante e comerciante chikito, mediano y grandi di Aruba tabata pa su Pueblo, cu el a sostene.
Ebby Arends ta uno di e Arubianonan cu a sirbi den cantidad di funcion na nivel empresarial, cu a sirbi Aruba den tur sentido y a duna prueba cu ora dolor bati na porta Aruba ta uno pa asina e pais por sigui cana.
E honor cu a wordo duna awor na empresarionan Arubano, cu na momentonan mas dificil no a bira lomba pa nan pais, pero a duna asistencia boca cera pa asina un comunidad por a sobrebibi, mester haya mas atencion pa asina Aruba comprende e papel asina importante di participacion di su propio hendenan den e ramo economico di e pais pa medio di comercio local, e fuente democratico pa entrega e ser humano na un forma liber, su pan di cada dia.
Mundo ta enfrenta momentonan dificil, pero Aruba lo por sigui cana dilanti cu e mentalidad cu e gran Arubianonan, manera Ebby Arends, a presenta na momento di dolor di Pueblo di Aruba.
