Minister Gerlien Croes ta expresa:
ORANJESTAD (AAN)- Minister Gerlien Croes a bisa, den entrevista cu DIARIO, cu gobierno mester empodera e sector primario, pasobra na Aruba mester importa tur cos, y esaki ta e peso di mas grandi cu tin pa nos pais.
“Si e prijs di producto eyfo ta subi, tambe e ta subi akinan, e importado ta subi su prijs” e dignatario ta remarca.
Seguidamente, e mandatario a reacciona tocante un argumento cu bin dilanti na su persona.
Esaki ta cu den pueblo hopi ta cuestiona gobierno cu ta gaba cu surplus y BBO plus, pero na final di dia e plus no ta drentando comunidad, y pueblo ta cuestiona cu gobierno a saca hopi comunicado e ultimo lunanan riba esaki. Anto, a puntra con pueblo mester compronde esaki? Cos ta bon? pasobra costo di bida ta keda dal nos tur dia.
Minister Gerlien Croes kier a rectifica e argumento aki bisando: “Nos no ta blof cu surplus. E gobierno saliente a blof cu surplus, pero e realidad cu nos a topa ta un debe mega grandi cu Aruba. Mi mes tin scol, mi ta kere na balor di 300 miyon cu no a wordo mantene. Claro, tur hende por tin surplus riba papel, pero si bo a laga tur caminda sin asfalta, sin renova nada, y tur bo lugarnan ta cay den otro, ta ki surplus bo ta papia di dje? Awo, surplus na unda, si bo tabata tin pensionadonan cu tabata struggle, ami ta corda bishitando nan cas, y ainda bo ta topa nan, con gradici nan ta cu e 400 of 500 Florin ey, cu nan a haya extra aña pasa”.
“Papia mi di surplus ora cu tur hende ta biba bon, y ainda bo a resta placa. Pero no, ora cu e situacion ta critico tur caminda, anto e personanan ta pasa den duro, bo edificionan a cay den otro, onderwijs no tin un edificio, gebouwnan di gobierno ta den mal estado, nos tin necesidad tur caminda, anto e ora ey e ta bunita pa bo bisa riba papel ‘ah mi tin surplus’ anto unda bo inversionnan ta? E placa tey segun bo, pero bo no a inverti den pueblo”, e dignatario ta acentua.
“Kiermen, e palabra surplus den politica ta wordo bunita uza, pero wak un rato rond kico nos ta bibando cu ne”, Minister Gerlien Croes a remarca.
