Solange Tchong, vocero di AZV:
- Pesey ta aconsehable pa warda e zorgpas cu ta caduca
ORANJESTAD (AAN) E Relacionista Publico di AZV, señora Solange Tchong, a sigui splica cu AZV ta informa e personanan cu ta desea pa nan AZV Zorgpas App, wordo poni riba e smartphone di otro persona, nan tin e opcion cu via un ID valido, sea su paspoort, cedula of rijbewijs un dunador di cuido por yud’e. Y tambe via su number di AZV cu ta unico.
“Pasobra mester corda cu e dunadornan di cuido tin e portal di AZV cu ta un sistema unda nan por subi, y a base di bo ID valido nan por controla bo datonan den e sistema, y wak si sea bo ta asegura na AZV of no. Esaki ta un informacion cu tur dunador di cuido tin.
“Y ami ta reitera, ta hopi importante, e zorgpas berdad ta caduca pero un detaye hopi importante, pa cada un di nos como cliente di AZV sa, cu e number cu bo tin riba bo carchi zorgpas di plastic, ta un number unico.
“Esey kiermen cu cada un di nos tin un number unico cu ta di dje, ta pertenece na dje. Anto pa e motibo ey nos kier bisa tur hende, si bo zorgpas a caduca mes, si bo ta desea bo por semper ward’e si, pasobra bo number ta e number di AZV unico.
Atrobe refiriendo na esnan cu no tin e AZV App pero nan kier prueba cu nan ta asegura, bo ta haci’e via bo ID valido, y esaki a un conseho cu nos ta duna na hopi di nos adultonan mayor, bisa nan: ‘ bo paspoort, cedula, rijbewijs valido, e dunador di cuido ta controla den e sistema y e ta haya sa si bo ta asegura of no. Y tambe si bo tin bo number di AZV, cu semper ta bo number unico como cliente”, Solange Tchong un biaha mas ta reitera.
