E motibo pa un account online di BOi t’asina importante

E motibo pa un account online di BOi t’asina importante

Relacionista Publico di DIMP Meverly Romano, ta splica:

  • Haya sa di e consecuencianan si bo no tin un BOi ainda 

ORANJESTAD (AAN)-- Den entrevista cu DIARIO, e Relacionista Publico di DIMP, señora Meverly Romano, a contesta e pregunta “Con importante e Cuenta di BOi ta, y ki consecuencia tin si no tine?”

   BOi ta un account di e plataforma di Bo Impuesto, y tur hende cu ta yena papel of ta atende impuesto, tin di habri uno.  Pasobra tur asunto ta bay na nivel digital awor.

   Meverly Romano a señala: “Un persona cu no tin BOi y e ta registra pa Inkomstenbelasting, e tin problema pasobra e ora ey e no por bay cumpli cu su deber di entrega su declaracion di Inkomstenbelasting; principalmente aworaki cu e ta completamente digital y manera nos a anuncia, nos no ta bay entrega e declaracion den forma di papel mas, manera antes”, Romano a señala.

   Kiermen, si e persona sa cu e ta registra pa Inkomstenbelasting, e tin e deber di entrega su declaracion, y e unico manera cu e por hacie ta e mester tin su cuenta di BOi pa e por drenta den e portal y click riba e folder di Inkomstenbelasting y e ta haya su debernan di cada aña, señora Romano a splica.

   “Den e caso aki ta un aña so pasobra e ta 2025. Pues, personanan cu no ta registra pa Inkomstenbelasting, den e caso aki e pensionadonan, por ehemplo esnan cu tin un entrada bao di 30 mil, nan no tin e deber di entrega un declaracion di Inkomstenbelasting tur aña. Pero esey no ta nifica cu nan no mester di tin un cuenta di BOi, pasobra corda cu e portal ta ofrece mas servicio, e ta ofrece cu bo por haci areglo di pago, bo por wak bo historianan di pago, bo por wak kico ta e suma cu bo tin habri na bo number di auto, bo por wak nos datonan den dje.

   Kiermen, nos ta recomenda pa tur persona tin un cuenta di BOi. Sea cu e persona ta registra pa Inkomstenbelasting of no, e tin e deber di cumpli cu esey. Pasobra, manera nos ta bisa’ keda sin cumpli no ta un opcion. Inkomstenbelasting si bo no entrega e declaracion, e boet ta cuminza na 250 Florin, y ta bay tin un maximo di 10 mil Florin. Depende di con halto e entrada di e persona ta”, señora Romano a remarca.