Estudio cientifico mester ta base pa emigracion y inmigracion Aruba
*Pensioen di behez ta causa emigracion y economia inmigracion
*Na nivel mundial demanda nacional profesional tin limite local
ORANJESTAD(AAN)—For di momento cu Cristobal Colon a dicici cu mundo ta rondo, el a crea e problema cu awe mester di solucion na Aruba y cu durante henter su existencia DIARIO mester a atende.
Un problema cu ya tabata existi na Aruba prome cu e Europeonan a yega pero cu historia skirbi no a registra pasobra e tempo, no tabata tin metodonan di traduccion di idioma di Indian pa Spaño.
Emigracion (hende cu ta bandona un pais) y immigracion (entrada na un pais)ta productor di historia di Aruba, un isla chikito cu un historia impresionante basa riba cambio den poblacion di e pais.
Economia a hunga un papel sumamente importante, ya cu como isla pa Aruba importacion tabata vital riba tur tereno.
Na e momento cu DIARIO a mira luz, economia creciente di Aruba a exigi un aumento di immigracion cu a conduci na crecemento di e poblacion cu na 1985, mester a drenta un parti historico nobo.
Na e momento cu DIARIO a mira luz, emigracion pa Hulanda ya tabata popular cerca un grupo di e poblacion cu a wordo atrae pa e leynan social di Hulanda, den cual sigur e pensioen di behez cu Hulanda tabata paga, a hunga un factor importante.
Principalmente na e parti Sur di Hulanda por a mira e crecemento di e emigrantenan Arubano entre otro, cu tabata haci uzo di e oportunidadnan cu Hulanda tabata ofrece mientras na Aruba a cuminsa importa mas y mas trahador pa cubri necesidadnan di e pais.
1985 a duna motibo directo pa loke por cualifica un exodo pa Hulanda.
Na hopi ocasion DIARIO a mustra cu ora ta papia di situacionnan actual na Aruba, sigur mester tene consideracion cu loke a nace a base di desaroyonan di e tempo.
Ciere di Lago a pusha Aruba den un situacion, cu un cantidad grandi di persona a bandona e pais pa sobrevivi e salida di Lago.
E recuperacion di Aruba, no tabata basa riba e ramonan industrial di Lago pero riba turismo, cu demanda diferente.
Esaki tabata tin un resultado pues pa e poblacion di Aruba cu di un banda Arubianonan cu a busca solucion pa nan destino den emigracion pa Hulanda of otro pais cu por a duna nan empleo industrial.
Den e tempo cambionan grandi tabata presenta den e sector petrolero y economia mundial cu mas y mas a haci turismo un salbabida economico.
Tabata tin cambio den e poblacion Arubano, cu awe mester wordo somete na un estudio den cual Aruba ta habri porta pa Arubianonan cu como hoben mester a uza Hulanda como asilo social y a crece na Hulanda, por bolbe cu nan famianan Aruba.
Esaki pues ta hiba nos na nos tema. Aruba mester di trahador, manera na 1985 industrianan Hulandes tabata atrae trahador despues cu ya Arubianonan cu tabata en busca di mihor areglonan social, a establece nan mes na Hulanda.
Durante ultimo lunanan, DIARIO ta trata na adverti, cu e situacion na Hulanda a conoce cambio grandi. Hasta ta wordo discuti si por mantene e situacion di pensioen di behez cu pa Aruba a bira costumber, na Hulanda.
Den e situacion nobo cu ta presenta na Hulanda, ta bira dificil pa e comunidad Hulandes pero tambe pa e Arubianonan cu a bandona Aruba a base di e ciere di Lago, y awor manera DIARIO a comprende, kier bolbe nan pais Aruba como pensionado cu yiunan cu kier traha na Aruba.
No mester lubida cu Arubianismo ta algo conoci mundialmente pa e realidad cu un Arubiano den su curazon semper ta keda Arubiano y sigur lo ta dispuesto pa forma parti di e ehercito laboral di Aruba.
DIARIO a splica kico a pasa ayera. DIARIO ta splica kico ta pasa awe y DIARIO ta splica cu mester realisa un estudio riba termino cortico pa atrae e cantidad di trahadornan Arubano na Hulanda, riba tur tereno, pa Aruba.
Mundo ta den un fase transitorio den cual hasta generacionnan ta reemplaza otro. Pero e Arubiano ta keda Arubiano y Aruba ta keda Aruba, cu brasa habri y awor oportunidad pa Arubiano!
Ta berdad cu na tur parti di mundo ta busca expertonan riba nan tereno. Expertonan, cu hopi biaha ta wordo mara na profesionnan basa riba estudionan mas avanza y cu ta sigui avanza.
Pero Aruba tambe a avanza y conoce entre otro Enseñansa pa Empleo cu ta preparacion y adaptacion cu trahador mester.
Aruba conoce institutonan di preparacion cu ta habri caminda pa hobennan aunke mester tene cuenta cu tin un grupo di trahador cu ta bira academico, cu ta keda un grupo limita tur parti di mundo. Awor un academico Arubano, sigur den tempo moderno, no por tin Aruba como su centro di operacion?
Nos ta bolbe na principio. Mester tin estudio pa nos tur comprende, kico nos ta papia!
