Te ainda profetanan tin problema pa haya reconocemento na nan pais --- *Tres di cada diez studiante na Hulanda ta traha pa por cubri gasto --- *Studiantenan ta haya oferta na Hulanda prome cu termina estudio
ORANJESTAD(AAN)—E persona cu ta encarga cu limpiesa di e baño cu cliente di un restaurant bishita, por ta su futuro dokter, abogado, bankero, experto den cushina di hotel.
Segun cifranan mas recien, alrededor di tres di cada diez studiante na Hulanda ta traha pa por cubri gastonan di estudio avansa na Hulanda.
Studia na Hulanda ta costo hopi placa pero e diplomanan y preparacion cu un persona ta obtene, tin reconocemento halto mundial y sigur na Hulanda mes.
E siman aki, por a tuma nota di declaracion di e Secretario di Estado Hulandes pa Relacionnan den Reino, Alexandra van Huffelen cu a papia di e cantidad di expertonan cu ta termina nan estudio na Hulanda pero no ta bolbe Aruba.
Un berdad, cu tin motibo tambe.
Na prome lugar mester tene na consideracion cu e studiante Arubano cu ta dicidi di bay sigui estudio den exterior pa profesionalisa su mes riba tur tereno, ta bandona Aruba na un edad hoben, gran maroria di bez soltero, cu gran ansiedad pa conkista tur oportunidad cu mundo tin pa ofrece.
E ta bandona su isla caminda mayoria di hende conoce otro, como un hoben cu ta bandona cas di su mayornan pa bay hiba un bida completamente diferente y sigur mucho mas exigente y pisa cu bida na Aruba.
Por bisa cu e fase di hoben pa adulto ta inicia, na momento cu e tuma despedida di su famia.
E diploma Hulandes tin reconocemento sumamente halto na mundo. Studia na Hulanda, ta exigi seriedad y sacrificio grandi di un persona irespecto e estudio pa cual e dicidi.
E hoben studiante mester busca un lugar pa e biba, loke ta e prome problema pa studiantenan Hulandes tambe. Pa mayoria di studiante Arubano “cas” ta bira un camber.
E mester costumbra den su ambiente nobo, cu cambio riba practicamente tur tereno.
E mester maneha placa y den 75 porciento di casonan na Hulanda pues, e hoben studiante mester busca un trabou di mas humilde, cu ta produci placa pa e por paga tur su gastonan cu den e ultimo dos aña a subi drasticamete.
Den su bida personal e mester bira adulto den e sentido cu e por maneha tur su necesidadnan personalmente.
Hulanda ta conoce pa su salarionan mas halto cu Aruba. Su gastonan tambe ta mas halto cu na Aruba.
Bida no ta facil pa un studiante na Hulanda, pais di profesionalismo y exigencia halto.
Pais tambe caminda companianan, institutonan y tur instancia cu mester di personal, ta sumamente atento pa e personanan cu bay core stage, tempo di practica, cerca nan.
Den hopi caso, aki ya oportunidadnan di trabou ta habri pa e studiante, cu a forma un circulo di amistad, un bida nobo y hasta famia.
Studiante cu debe tambe pa paga y cu mester di placa pero na prome lugar e oportunidad pa demostra su capacidad, crea su Curriculum Vitae, cu ta bira su base profesional.
Kico ta ofrece e studiante ora e bolbe Aruba? E hoben cu a bay studia, no ta existi mas. Un profesional ta bolbe Aruba, e cas cu e stima, pero caminda e mester haya reconocemento profesional pero tambe oportunidad pa paga su debenan, instala su mes y tur loke ta bini acerca.
Esaki ta e problema, cu hopi hende ta silencia. E salida di un studiante y e regreso di un profesional, cu mester sigui profesionalisa su mes resto di su bida a base di cambionan cu ta presenta.
Un profesional, cu tin derecho riba un bon entrada, pasobra su gastonan ta halto y cu no por wordo atende como profesional di segundo clase, pasobra el a nace na su pais y asina ta un cara conoci for di momento cu el a nace.
E Arubiano den e gran mayoria di caso, ta keda Arubiano cu e anhelo pa ta na su cas. Pero su cas tambe mester acepta su sacrificio, su lucha pa a alcansa loke el a alcansa.
Un futuro nobo ta spera Aruba, cu a produci cantidad di Arubiano capacita, pero tambe portador di Arubianismo, e ingrediente tan importante pa construi un nacion!
