Directie Natuur en Milieu ta informa:
ORANJESTAD (AAN): E turtuga di lama Cawama (Caretta caretta) ta e di dos turtuga di lama mas grandi na mundo. Na Ingles nan ta yam’e Loggerhead, e turtuga di lama aki ta haya su nomber na Ingles pasobra su cabes grandi ta casi 25 centimeter. E ta un reptil marino cu ta pertenece na e famia Cheloniidae.
E cawama ta midi alrededor di 90 cm largo y ta pisa den average mas o menos 135 kilo ora e ta completamente desaroya. E curpa di e bestia ta varia di color geel te cu bruin y e casca ta bruin cora. E cawama embra ta subi tera firme pa pone su webonan. Cawama ta coba buraco den santo blanco pa pone e webonan, un average di 100 webo.
E cawama ta yega na madurez sexual entre 20 pa 30 aña y tin un ‘lifespan’ entre 47 y 67 aña. E cawama ta omnivoro y ta come principalmente invertebranan cu ta biba na fondo. E menasa mas grandi pa e turtuganan di lama ta perdida di habitat pa pone nan neishi debi na desaroyo di area di costa.
Otro problema ta strobacion humano di iluminacion na costa. Esaki ta causa desorientacion di e bestia y e yiunan ora nan sali fey nan neishi pa busca oriya di lama.
Pa cu esaki tin un documento riba DNM su website titula ‘SOP Wildlife friendly lighting’ pa e procedura pa tene cuenta cu ne ora di iluminacion y e miho practicanan. Otro menasa p’e bida di turtuganan di lama ta sushedad di plastic y tambe ora nan pega den liñanan of redanan di pisca.
E esfuersonan pa restaura e cantidad di e especie aki ta keda a base di cooperacion internacional.
