E Master Plan “Reposicionando e Rumbo di Nos Pais” ta provee un structura di strategia pa realisa reformanan structural pa construi un Aruba mas fuerte

ORANJESTAD (AAN): Durante Gabinete Wever-Croes I  a inicia un proceso di planifica con Aruba por sali mas fuerte dilanti despues di e pandemia global Covid-19, cu Aruba a haya su mes aden den 2020.

E Master Plan “Reposicionando e Rumbo di Nos Pais” ta provee un structura di strategia pa realisa reformanan structural y e obhetivo pa construi un Aruba mas fuerte, permitiendo desaroyo economico cu ta inteligente, inclusivo y resiliente.

E acuerdo firma cu Hulanda (Landspakket) tambe ta forma parti di e reformanan pa e añanan nos dilanti. Mayoria di e temanan den e acuerdo firma ta acopla na e temanan den e masterplan. Esaki ta haci cu e caminda pa encamina ta cuadra cu e pensamento local pa reforma y restructura Aruba pa un Aruba resiliente y fuerte den periodo nos dilanti.

Gobierno di Aruba, y specificamente Ministerio di Asuntonan General, Innovacion, Organisacion di Gobierno y Infrastructura, ta considera esaki un base amplio, significativo y representativo pa delinea su maneho di gobernacion. 

ASUNTONAN GENERAL:

Ministerio di Asuntonan General ta encarga cu e coordinacion di implementacion di e masterplan. Den e añanan nos dilanti lo traha riba diferente estudio di e solucionnan factible y realistico y nan implementacion.

Tur esfuerso di Gabinete Wever-Croes 2 lo ta dirigi na recuperacion di nos pais, principalmente recuperacion economico. 

• Masterplan Reposicionando e Rumbo di Nos Pais 

E Masterplan “Reposicionando e Rumbo di Nos Pais” ta diseña pa ta un plan dinamico cu ta provee un structura di strategia pa por tuma decisionnan den un manera integral. E plan tin e obhetivo pa construi un Aruba mas fuerte, permitiendo desaroyo economico cu ta inteligente, inclusivo y resiliente.

E Aspiracion Nacional ta wordo traduci den 8 Mision Nacional cu ta describi den detaye den e masterplan y ta pone e direccion pa logra resiliencia a medio- y largo plaso.

E Misionnan Nacional tin como meta recomendacion inter-sectoral impulsa pa accion pa un modelo economico nobo y sostenibel pa Aruba agrupa den tres (3) pilar principal (temanan general) cu ta sirbi como unificacion pa e misionnan. 

• Top 5 Proyectonan di aceleracion

E implementacion di e masterplan aki lo rekeri recurso humano dedica y inversionnan financiero pa hacie procesabel. Respectivamente, e siguiente proyectonan cu impacto positivo halto (es decir aceleracion) a ser identifica pa wordo apunta como e prome orden di tarea. 

• Estado di Derecho 

Pa fortifica nos estado di derecho, e colegionan halto di estado lo wordo fortifica pa por cumpli cu nan tarea, y lo wordo independisa aun mas. E cambionan legislativo pa institui e Ombudsman lo wordo finalisa. Reforma e structura y diversificacion di economia por sosode solamente si tin un regulacion y structura di strategia robusto, moderno y transparente pa sostene esaki.

Pa cu esaki mester adresa e problema di e capacidad pa traha leynan pa por acelera recuperacion economico, crecemento y soporte na e modelo economico nobo.
            E metanan principal ta pa mehora y fortalece capacidad legislativo y introduci innovacion den manera di regula, y re-enforsa e estado di derecho.
            Specificamente, lo realisa e meta principal por medio di e siguiente obhetivonan:

- Desaroya roadmap y prioritisa e modernisacion di leynan cu lo crea un aparato gubernamental mas efectivo y sistemanan mas simpel.

 - Acelera y aumenta capacidad legislativo.

- Crea un plan di accion pa ehecuta e roadmap y Integra implementacion di “Uitvoeringsplan: Verbetering van de capaciteit en Doorlooptijd van wetgeving”. 

• Relacion den Reino y relacion exterior

Gabinete Wever-Croes 2 su maneho den e añanan nos dilanti lo ta enfoca riba crea oportunidadnan nobo den Reino y internacional dirigi riba recuperacion di nos pais, especialmente recuperacion economico. 

INNOVACION 

Innovacion no ta un producto, pero un herment pa por logra metanan di gobernacion y mehoracion di calidad di bida pa e ciudadano.
            E metanan principal ta pa institutionalisa innovacion den gobierno cu un fundeshi solido pa futuro, brinda miho servicio na e ciudadano na un manera transparente y eficiente, y desaroya talento local.
            Lo realisa e meta principal por medio di e siguiente obhetivonan"

• Finalisa establecemento di e departamento nobo di gobierno di innovacion, esta Directie voor Innovatie (DvI), cu lo coordina innovacion pa gobierno na un manera consistente, structura y centralisa.
• Ehecuta maneho di e-Government Nacional: e-Government Road Map 2020- 2025 “A Better Citizen Experience”, cu enfoke riba entre otro Implementacion di proyecto interoperability platform. Introduccion di un number personal unico di identificacion, Digital ID, Inversion den infrastructura di IT di gobierno (hardware y software). Proteccion di datonan personal y siguridad cibernetica, mas eficiencia den servicio di gobierno y eliminacion di red-tape.
• Colabora cu Futura Innovation Lab pa ehecucion di proyectonan pa desaroyo di talento local cu enfoke riba ‘21st Century Skills’, entre otro Introduccion di e-Learning na scolnan primario y secundario, Desaroyo di programa di educacion profesional riba tereno di IT Management & Cybersecurity. 

ORGANISACION DI GOBIERNO 

E meta principal ta pa reforsa capabilidadnan institucional y di gobernacion, door di desaroya sector publico pa ta uno agil, confiabel y ta duna servicio di balor agrega na comunidad. Lo realisa e meta principal por medio di e siguiente obhetivonan:

• Realisa un estado husto y hisa efectividad di servicio di sector publico, door di brinda servicio mas rapido y cu menos burocracia.
• Sigura integridad y transparencia den tur e procesonan gubernamental. Accionnan di prioridad:
• Business model review, efectua un quick-scan pa identifica areanan di oportunidad pa mehoracion di servicio publico, y revisa cual servicionan ta principal pa un bon funcionamento di gobierno y cual lo tin cu evalua pa merge, descontinua of outsource (organisatie doorlichting). • Implementacion di eGovernment roadmap.
• Measurement & Monitoring, pa analisa y mehora procesonan y servicionan a base di datos y train lidernan y management di departamentonan (capacity building).
• Introduci un modelo di sector publico cu ta “performance based”. • Desaroya maneho di change-management cu enfoka riba hisa productividad y maneho efectivo di recursonan humano. 

INFRASTRUCTURA Y DESAROYO TERITORIAL 

Un punto di salida ta un maneho transparente y husto pa desaroyo di infrastructura, maneho di tereno y desaroyo teritorial sostenibel. E metanan principal ta administracion eficiente, productivo, desaroyo responsabel na medio ambiente, y un transicion nacional sistematicamente pa un modelo circular cu ta pagabel y realisabel. 

Lo realisa e meta principal por medio di e siguiente obhetivonan:

• Elimina atrasonan de procesamento di peticionnan pa otorgamento di tereno, y diferente permisonan.
• Implementa un cuadro di maneho di infrastructura y medio ambiente cu ta integral y alinea cu ROP, ROPV, enforsa complimento cu leynan y maneho di construccion, desaroyo sostenibel y medio ambiente y hunto cu Ministerio di Naturalesa brinda un solucion structural na e problema di RWZI.
• Desaroya maneho pa stimula construccion cu ta hisa eficiencia di energia, adaptacion di clima, y adherencia na regulacionnan ambiental (build with nature).
• Optimalisa uzo di tereno y espacio limita. • Aporta na maneho nacional di cambio di clima y resiliencia (climate change & climate resilience).