Ronella Croes, director di ATA:
- ATA lo sigui traha pa diversifica nos mercadonan
ORANJESTAD (AAN) Ronella Croes, CEO di ATA, a referi cu ATA lo sigui traha pa diversifica e mercadonan di turismo pa Aruba, ya tin cierto temor cu e Presidente di Merca, lo por crea un caida di turismo pa nos region.
“Mi tin cu bisa cu mester keda creativo, innova bo producto tambe, y prepara no solamente e parti di e mercado Mericano, pero corda tambe cu e mercadonan cu a bay sumamente bon, te cu aworaki, ta Brasil y Argentina, entre otro. Y nan ta premira di sigui ta hopi fuerte e aña aki”, Ronella a subraya. ATA lo sigui traha riba diversifica mercadonan.
“Nos no tin cu bay bek na hopi luna pasa. Na Maart nos a wordo yama pa Parlamento y e Ministernan a puntra kico ta e proyeccion, pasobra kizas e maneho di e Presidente Mericano lo por conduci na un caida, pues nos mester sa di mantene. Un caida ta un alarma y nos no kier esey. Pues, nos a pone extra esfuerzo den e otro mercadonan pa sigui diversifica”, Ronella Croes a remarca.
El a agrega cu pa e motibo aki, por ehemplo, e ta bisa cu e mercado di Europa lo por cera su crecemento e aña aki cu 9%, pasobra ATA a caba di anuncia dos vuelo adicional di KLM, cuminzando e ultimo cuartal di 2025. “Esaki ta un refleho di e esfuerzonan di diversificacion cu semper tabata tey, pero cu nos a intensifica den e segundo cuartal di e aña aki, y cu ta dunando su fruto tambe”, Directora di ATA, señora Ronella Croes, a conclui.
