Comercio y Sindicato mester suscribi e balor di trabou den comunidad --- Henter mundo mester regresa na normalidad den situacion excepcional --- Sin trabou no tin entrada pa ciudadano y pa pais cu mester paga asistencia
ORANJESTAD(AAN)- Aruba como parti di mundo cu ta pasa den situacionnan sumamente dificil a base di Covid-19, mester adapta su mes na e realidad cu hende no por cambia.
Den e situacion aki no tin espacio pa wega politico ni na forma directo of indirecto.
E base di democracia mester wordo aplica y mantene pa asina e pais por funciona manera bon gobernacion ta exigi.
Un Gobierno ta responsabel pa un comunidad funciona. Pa por haci su trabou, Gobierno a ricibi di democracia, e responsabilidad pa percura pa e placa cu e comunidad produci y entrega na Gobierno pa maneho di e pais, wordo bon utilisa.
Lamentablemente na Aruba ainda, e ley cu ta directamente mara na e bon funcionamento di democracia, cu ta e Ley di Contabilidad, no conoce sancionnan cu ta manda gobernantenan prison sin mas ora nan abusa di placa di Pueblo.
En todo caso, un bon gobernacion mester percura pa tin trabou pa Pueblo, cu na un pais democratico ta wordo produci dor di comercio, cu realmente ta un grupo di trahador cu ta traha pa nan propio empresa.
Pues e comerciante tambe ta trahador y tambe mester traha pa e sobrevivi.
Uno di e tareanan cu un bon gobernacion di un pais cu kier biba a base di su concenshi sano ta, cu ta e pais ta duna asistencia na personanan cu pa un cierto tempo no por percura pa nan propio entrada.
Ley ta trece claramente dilanti cual ta e gruponan cu no por produci pa nan mes y den curso di tempo a introduci varios forma pa nan tin entrada.
Pensioen di Behes pa hende di edad avansa cu no por sigui traha. Pensioen pa Huerfanonan y Vuidanan.
Asistencia social a wordo crea pa personanan cu temporalmente of pa condicion aceptabel no tin nan propio entrada.
Den leynan social ta bon stipula kico ta e exigencianan pa hende haya asistencia social, cu ta bini di trahadornan sea cu ta traha pa Gobierno of pa Empresa Priva como propietario of personal di un negoshi.
Aruba a pasa den un pandemia. Pero prome cu Aruba a pasa den pandemia ya for di 2014 ta conoci cu placa a caba.
Tur hende ta na haltura cu Aruba no tin placa mas y loke por a pasa ayera, awe no ta posibel.
Uno di e factornan hopi conoci ta, cu Aruba a crea gastonan di personal di Gobierno cu Aruba awe no por paga mas.
Aunke tur hende ta odia e palabranan “era colonial”, tin herencia di e era colonial cu Aruba a mantene y uno di nan ta areglonan pa personal di Gobierno cu ta data for di tempo cu personal di Gobierno tabata bini di Hulanda y tabata haya entrada special.
Aruba, mescos cu otro islanan cu tabata colonia Hulandes, a mantene tradicionnan di pago cu a wordo introduci base di leynan cu ta resultado di era conocial.
Awe ainda pandemia no ta tras di lomba.
Produccion mundial ta den problema. Aruba ainda no tin su entrada prome cu e momento, cu na 2014 a wordo dicidi cu Aruba ta biba riba normal pasobra Aruba no tin placa pa paga ni su gobernacion ni su personal.
Na 2020 den un situacion di Pandemia a introduci Fase, cu awe mester cambia.
Honestamente nos ta spera pa nunca mas Fase ta necesario pasobra e ta papia di e tempo cu morto tabata wordo sembra dor di un malesa cu a pone e pais cera porta pa turismo y entrada.
Awe Aruba mester bolbe na un normal nobo. Un normal cu Pueblo di Aruba por paga pasobra ta for di saco di Pueblo di Aruba e placa mester sali.
Mester sigui duna sosten na tur cu no por tin nan propio entrada.
Sinembargo, mester bolbe na trabou y awe mas cu nunca mester deshaci di berguensa pa traha cu a wordo cultiva.
Trabou awe ta haya e significacion halto cu e tin como e instrumento pa duna entrada na tur hende.
Despues di un pandemia Gobierno mester hiba Pueblo atrobe na e realidad, cu Pueblo por paga pasobra e placa no ta di Gobierno, ni di Sindicato ni di Comercio. E placa ta di tur trahador cu mester sigui e reglanan di un comunidad solido, democratico cu semper ta comparti cu esun den necesidad cu mester di asistencia social pasobra e no por participa na trabou.
