E forsa di un Pueblo na defensa di su libertad y dignidad nacional --- *Awe mundo ta uni contra colonialisacion di un Pueblo liber --- *Cincuenta aña pasa e alma liber di Aruba tabata hopi solitario
ORANJESTAD (AAN) — 18 di Maart ta nos dilanti. E Dia di Himno y Bandera di Aruba como simbolonan di e union di e Pueblo cu a logra alcansa e status di un Pueblo Autonomo den Reino Hulandes.
Na 2022 Aruba ta celebra su Dia di Himno y Bandera den un situacion mundial, caminda e soberania di un pais ta na disputa y e Pueblo di Ukraine ta wordo menasa di perde su cas y su identidad como Pueblo.
E realidad internacional na Maart 2022, sigur ta ocasion pa refleha kico a pasa cu Aruba, cu despues di un crisis financiero causa pa mal gobernacion financiero, for di 2014 a perde e base mas importante di Status Aparte cu ta e autoridad di Aruba pa hiba su propio maneho financiero.
For di momento cu Reino Hulandes a bati na porta di Aruba na 2014, Aruba a perde su e autonomia pa cual Aruba a hiba un lucha feroz.
Pa hobennan lo ta dificil comprende con e Arubiano a lucha pa su Status Aparte.
Loke ta pasa awe na Ukraine por duna un splicacion di loke e Arubiano a sinti ora na 1977, el a lanta para pa su derecho como Pueblo pa dicidi pa su bienestar.
E lucha di Augustus 1977 tabata resultado di e hecho cu no tabata tin comprension pa e deseo di e Pueblo di Aruba, pa drenta un futuro como un pais autonomo den Reino Hulandes.
Na 1977 e partido mas grandi di Aruba no por a drenta Gobierno Central, cu tabata depende di coalicion di partidonan Antiano. Esaki a haci cu un partido minoritario di Aruba, cu tabata sostene e idea di un Federacion Antiano y tabata opone Status Aparte, por a bira e representante di Aruba den Gobierno di Antia Hulandes.
Betico Croes y e lucha di Aruba pa Status Aparte a worde tene for di Gobierno loke a nifica cu e deseo di autonomia di Aruba a wordo bari for di mesa.
Awe e Pueblo di Ukraine ta duna expresion na loke ta pasa ora democracia no ta existi.
E Pueblo di Ukraine por uni su mes na Rusia y bira parti di Rusia y asina hasta gosa di poder mas grandi.
E Pueblo di Ukraine a keda fiel na su mes y awe mundo ta lanta para pa sostene e Pueblo aki.
Dia di Himno y Bandera di Aruba ta wordo celebra dia 18 di Maart. Un dia cu ta splica cu Aruba no a ricibi e sosten cu awe mundo ta duna por ehempel Ukraine den su lucha pa su libertad.
E Pueblo di Aruba, ora bay den profundidad di realidad y husticia, tabata tin derecho riba su autonomia, su propio gobernacion autonomo den Reino cu ni Reino ni Curacao kier a acepta.
Na e otro islanan a surgi partidonan cu tabata dispuesto pa sostene Aruba pero hasta na Aruba mes tabata tin e partido cu a forma Gobierno y a laga Betico Croes for di e Gobierno.
Na 1983 Reino Hulandes porfin a bay di acuerdo cu e Pueblo di Aruba, cu awe tin motibo pa celebra Dia di Himno y Bandera y entrega na futuro generacionnan e mensahe di orguyo legitimo di un pais, cu a nenga di baha cabez, a lucha, a lanta para pa su libertad, pa cual awe Ukraine ta bringa.
