ORANJESTAD (AAN) — Aruba ta prepara pa bay urna electoral, caminda e scoge representantenan cu mester hura dilanti Dios cu nan lo sirbi bienestar di e pais y di tur ciudadanonan.
Partidonan politico segun e alma di democracia tin e deber di entrega na un comunidad, candidatonan cu por sirbi bienestar di un comunidad y no bienestar di un grupo politicamente elitario, di amigo ni conoce.
Un politico mas cu ningun persona mester conoce reglanan di Ley cu hende cu concenshi limpi mester traha y ehecuta pa asina e bienstar di Aruba y di henter comunidad wordo sirbi.
Bay prizon pa tur hende ta un dolor grandi. Un dolor pa e persona mes, pa su famia y tur cu conoce.
Esaki ta haci cu na un pais democratico, tin reglanan cu ta dicidi bou cual circumstancia y con un hende ta wordo encarcela.
Persecucion penal no ta asunto personal di un solo agente politicial, un solo Fiscal, un solo Huez. Persecucion penal ta basa riba Codigo Penal cu dor di persigui loke ta malo ta evita cu otro ciudadanonan ta wordo perhudica.
Husticia tin e tarea pa evita cu hende inocente ta yora pa motibo di persecusion pasobra nan tin un color politico of cualkier otro distincion den un comunidad.
Husticia mester ta ciego.
Den e proceso di Husticia na Aruba, persecusion penal ta den man di Ministerio Publico di Aruba, cu na forma independiente hasta pa influencianan pafor di Aruba, ta uza reglanan di ley pa investiga casonan y pa tuma decision.
Den e proceso di persecucion, Huez Comisario ta dicidi riba detencion. Ta Huez Comisario ta dicidi cuanto tempo por tene un persona den estado di detencion y ora papia di encarcela un persona pa un periodo mas largo, mester tin suficiente prueba.
Den Corte ta Huez ta dicidi kico mester pasa y decision di Huez por wordo apela pa finalmente hasta por wordo presenta den Cassatie na Hulanda, caminda ta repasa si e proceso tabata cuadra cu ley.
Por socede cu un persona ta wordo persigui pero ta resulta cu e ta inocente. Ta pa e motibo aki, e sistema di Aruba ta bisa cu ta ora un Huez pronuncia un veredicto, esaki ta drenta den efecto pa hende.
Bay prison ta algo horibel pa tur hende y pa tur famia concerni. Pero castigo di prison ta pa evita victimanan cu ta yora a base di delito cu ta wordo comete contra nan persona. Bay prison ta e castigo cu ta wordo duna pa haci algo malo contra un persona of un comunidad.
Corupcion ta destrui un comunidad. Corupcion ta kibra e fundeshi di un comunidad y ta causa lagrima di un pais, di un comunidad, di su hendenan.
Awe Aruba ta pasa den un proceso doloroso. Pero mescos cu Husticia no por uza politica pa persigui hende, politiconan tambe mester evita tur indicacion, cu nan por ta participantenan den corupcion, cu ta un palabra cu ta papia pa su mes.
Pasobra corupcion kier meen destrui materia sano y asina destrui loke ta bon!
