Segun Oficina di Estadistica:
ORANJESTAD (AAN): Den e ultimo diesdos (12) lunanan e indice di “Cuminda & servicio di catering” a subi cu 5.4%. E indice di “Cuminda na cas” a conoce un subida di 4.4%, unda ocho (8) di e diesun (11) indicenan di e gruponan di “Cuminda na cas” a subi durante e periodo aki.
E indice di “Sucu, jam y otro tipo di cos dushi” a conoce un subida di 13.8%, e subida mas grandi entre e gruponan di “Cuminda na cas”.
Ademas otro subidanan significante a wordo registra den e indicenan di “Restante productonan pa alimentacion” (11.8%), “Batata, yuca y batata dushi” (11.3%), “Bebida no-alcoholico” (9.0%), “Pan y otro productonan di grano” (8.7%) y “Lechi, keshi y webo” (6.1%).
E caida mas grandi durante e periodo aki a wordo registra den e indice di “Fruta” (-6.2%). E indice di “Cuminda pafo di cas” a registra un subida di 7.9% den e ultimo diesdos (12) lunanan.
Cambio di prijs di Cuminda y servicio di catering na Augustus 2023
E indice di “Cuminda & servicio di catering” a registra un subida di 0.3% na Augustus 2023, despues di un subida di 0.6% na Juli 2023. E indice di “Cuminda na cas” (0.1%) a registra un subida, unda ocho (8) di e diesun (11) indicenan di e gruponan di cuminda na cas a subi na Augustus 2023.
E indice di “Batata, yuca y batata dushi” a conoce e subida di mas grandi (8.4%) na Augustus 2023. E indicenan di “Sucu, jam y otro tipo di cos dushi” (2.1%), “Restante productonan pa alimentacion” (0.8%), “Pisca y otro cuminda di lama” (0.5%) y “Berdura” (0.5%) tambe a registra subida.
E caida mas grandi a wordo registra den e indice di “Fruta” (-1.9%) na Augustus 2023. E indice di “Cuminda pafo di cas” a subi cu 0.6% na Augustus 2023.
Na Augustus 2023, “Cuminda na cas” y “Cuminda pafo di cas” como grupo, tawata tin un subida di prijs di 0.3% compara cu Juli 2023 y hunto tawata tin un influencia di 0.04 ppt riba e CPI, mientras cu e restante bienes y servicio hunto a experencia un subida di prijs di 0.8% y tawata tin un efecto di 0.65 ppt riba e CPI.
