Indice awor ta na 92,7 den e promer trimester di 2026
ORANJESTAD (AAN): Banco Central di Aruba (BCA) a conclui e Encuesta di Confianza di Consumidor pa e promer trimester di 2026. E encuesta di confianza di consumidor ta evalua e percepcion economico di e consumidor local.
Preocupacion principal di consumidor den e promer trimester di 2026 pa e siguiente 6 lunanan:
(*) Deterioracion den e situacion di negoshinan y di e economia a subi na 68% (2025-IV: 36%).
(*) Alrededor di 53% di e respondentenan ta premira cu lo ta mas dificil pa haya un trabao nobo (2025-IV: 32%).
(*) Como 41% di respondentenan ta premira cu e posicion financiero di gobierno lo empeora (2025-IV: 31%).
(*) Como di 35% di e respondentenan ta premira cu e situacion financiero di nan hogar lo deteriora (2025-IV: 13%)
(*) Consumidornan a keda pesimista, mirando cu e Indice di Confianza di Consumidor a baha cu 3,7 punto di indice na 92,7 den e promer trimester di 2026 (mira Grafico 1).
E Indice di Habito di Consumidor a baha cu 4,4 punto di indice te na 93,3 durante e promer trimester di 2026. E Indice di Situacion Actual y e Indice di Expectativa tur dos a baha den e promer trimester di 2026 cu 3,8 punto di indice te na 92,5 y 3,6 punto di indice te na 92,7, respectivamente. Mientrastanto, e Indice di Expectativa di Prijs a baha un poco te na 90,2 durante e promer trimester di 2026 (mira Grafico 2).
Prijsnan mas halto den e proximo 6 lunanan ainda ta keda un preocupacion grandi pa e respondentenan, como cu 96% di consumidornan ta premira cu den e siguiente 6 lunanan prijsnan lo ta mas halto.
Respondentenan cu a indica cu nan no por “cumpra mesun hopi cu nan entrada compara cu 6 luna pasa” a subi cu 13 punto di porcentahe te na 93% den e promer trimester di 2026. Pa locual ta e respondentenan cu a expresa cu nan ta spaar menos, esaki a crece cu 14 punto di porcentahe te na 46% den e promer trimester di 2026.
E relato completo di e Encuesta di Confianza di Consumidor ta disponibel ariba website Banco Central di Aruba.
{gallery}E Indice di Confianza di Consumidor a baha cu 3,7 punto{/gallery}
