Parlamentario Darlaine Guedez-Erasmus (MEP):
*Enfoke riba e muchanan ta esencial den comunidad
ORANJESTAD (AAN): Hende Homber tambe a celebra nan dia diadomingo ultimo y Parlamentario Darlaine Guedez-Erasmus tabata tin palabranan di felicitacion pa tur e hende hombernan den nos comunidad.
"Hende homber ta hopi importante den nos comunidad. Nan rol ta trece sigur un balans, entre hende muhe y hende homber. Esey ta yuda tambe fortifica un comunidad, un famia fuerte. Mi kier gradici tur hende homber pa tur nan esfuerso cu nan ta haci pa hiba nos pais pa dilanti", e Parlamentario a expresa.
Na mesun momento, el a felicita tur mucha di Aruba riba nan dia internacional di derecho di mucha. "Mi kier felicita nan. E weekend cu a pasa tabata tin un bunita celebracion (...) Mi persona tabata na Carnival Village unda cu nos por a mira un bunita actividad cu a ser organisa pa e muchanan di henter Aruba. E biaha aki tabata na e parti di San Nicolas unda cu tur e muchanan di bario por a cana bini y asina participa den e bunita evento aki", Guedez-Erasmus a manifesta.
Tabata tin diferente actividad pa e muchanan por a disfruta di un tremendo dia caminda nan por a come, bebe y gosa. El a haya hopi bon cu e comision organisado por a varia esaki. Aña pasa esaki a tuma lugar na Oranjestad y e aña aki a traslad'e pa San Nicolas. Tambe a mira e centronan di bario cu tambe a organisa nan actividad e weekend cu a pasa y e siman aki tambe tin varios otro celebracion en conexion cu Dia di Mucha.
"Esaki ta hopi bunita pa mira unda cu mayornan por bini cu e muchanan y asina participa. Manera nos sa e muchanan ta central y nos mester duna nan tempo, atencion, cariño. Esey ta hopi hopi importante", e Parlamentario a agrega.
Parlamentario Darlaine Guedez-Erasmus tambe a referi na un ley cu a wordo trata diamars den Parlamento cual ta Plan di Mayor y cu tin conexion cu nos muchanan. Ta bunita pa mira cu e tratamento aki ta cay den e siman aki. Plan di Mayor ta un ley caminda tin un plan pa ambos mayor sinta hunto y planea kico ta bay sosode despues di un separacion. E intencion ta pa comparti e responsabilidadnan hunto y keda involucra den e mucha su bida, a remarca.
Banda di esaki, na Centro Hoben y Famia na Wayaca un loket a wordo poni cu profesionalnan caminda ta brinda ayudo y guia na e mayornan.
Darlaine Guedez-Erasmus a informa cu e ley aki a wordo aproba diamars pa Parlamento y e ta hopi contento di mira cu e muchanan ta keda central tambe den comunidad y na prome luga. “Pareha ta bira ex pareha, pero un yiu nunca ta bira un ex yiu”, Parlamentario Guedez-Erasmus a finalisa.
