Minister Geoffrey Wever: --- ORANJESTAD (AAN): Comerciantenan na Aruba frecuentemente ta encontra dificultad door di falta di un “level playing field” a
consecuencia di comerciantenan cu no ta tene nan mes na reglanan di permiso y impuesto y tambe door di concurencia inhusto door di formacion di cartel of door di companianan poderoso. Banda di esaki consumidornan y companianan ta wordo perhudica door di falta di un maneho dirigi riba concurencia.
Den cuadro di e programa pa mehoracion di e clima empresarial y clima di inversion na Aruba, proyecto 3 “Implementacion di Aruba Fair Trade Authority” tin como resultado cu e ordenansa nacional encuanto competencia (mededingingsverordening) ta drenta den vigor y cu e supervision di esaki, den man di e autoridad independiente di competencia (mededingingsautoriteit), yama “Aruba Fair Trade Authority” (AFTA), ta bira operacional.
E meta di e ordenansa nacional di competencia ta pa garantisa un desaroyo economico duradero y stipula regla encuanto acuerdonan cu ta limita competencia (mededingingsafspraken) y posicion di poder (machtspositie), como tambe stipula regla pa cu supervision riba concentracion di empresanan.
E posicion den sociedad premira pa AFTA por wordo describi como independiente, den medio di e sociedad cu un reputacion influyente serca e cuidadanonan di Aruba, comunidad empresarial, politica, gobierno, ciencia y abogacia. AFTA ta un participante prominente den debatenan publico encuanto mercado y supervision.
Minister Geoffrey Wever: “Reglanan di concurencia y supervision efectivo ta contribui na dinamismo y diversificacion di economia, innovacion, prijsnan abou pa consumidornan y companianan y miho calidad di servicio y producto.” “E implementacion di e autoridad independiente di competencia ta den interes di henter pueblo di Aruba”.
