Diadomingo a drenta e tristo noticia:
ORANJESTAD (AAN)--Ayera, Diadomingo 9 di Augustus, den oranan atardi a drenta e tristo noticia cu Amy Lasten a bay sosega den Reino di Dios.
Un noticia cu a drenta sorpresivamente, y manera por a lesa riba Facebook, el a impacta hopi hende den nos comunidad.
Amy Lasten a destaca su mes como juffrouw di teatro, actriz, director y promotor cultural di Aruba, cu un trayectoria hopi largo promoviendo teatro y artenan escenico riba nos Isla.
El a wordo forma den e Scol di Teatro di Amsterdam na aña 1985 unda a obtene su titulo di Profesor di Teatro prome grado. Durante hopi aña el a traha na Instituto di Cultura, y ultimo temponan na Departamento di Cultura Aruba, cu e tarea di revitaliza y profesionaliza e mundo local di teatro, y organiza tayernan di teatro creativo y tecnico pa hoben. E hobennan semper tabata su enfoke principal, y ta hopi e hobennan cu a bira actor y actriz aki na Aruba, bao liderazgo y formacion di Amy Lasten.
El a duna les di formacion artistico y arte escenico na Instituto Pedagogico Arubano. Na aña 2007, a ricibi un prestigioso reconocemento di e premionan nacional di Teatro Aruba, pa su incansable aporte na e desaroyo di arte escenico y su trabao cu e generacionnan nobo.
DIARIO tin palabra di sincero condolencia pa su famia, coleganan, amistadnan y ex-alumnonan. Paz na su alma!
