ORANJESTAD (AAN): Den un publicacion recien titula ‘70 Jaar Statuut voor het Koninkrijk’,
Raad van State a pone enfasis riba un punto crucial pa Aruba y demas pais di Caribe den Reino: e rol y funcion vital di e minister plenipotenciario, cu ta e representante oficial di e paisnan di Caribe na Den Haag. Raad van State a duna conseho pa fortalece e posicion di e ministernan plenipotenciario pa asina logra un cooperacion husto y efectivo den Reino.
E posicion di minister plenipotenciario no ta un prome minister ni un minister di e pais mes. E ta un figura cu ta keda nombra pa representa su pais respectivo, Aruba, Corsou of Sint Maarten, den e Conseho di Minister di Reino, caminda ta tuma desicionnan riba asuntonan di Reino manera defensa, nacionalidad y relacionnan internacional. E minister plenipotenciario ta e liga constitucional entre e paisnan den Caribe y Hulanda.
Pero Aruba actualmente no tin un minister plenipotenciario. Desde cu e gobierno actual a tuma oficio, e posicion aki ta habri te ainda. Esaki ta significa cu Aruba no tin un representante directo den Den Haag, ni un bos presente na e mesa caminda desicionnan importante pa e Reino, inclui Aruba, ta wordo tuma.
Raad van State ta indica den su publicacion cu e papel di e ministernan plenipotenciario mester wordo fortifica, no debilita. E ta enfatisa cu aunke nan tin un rol formal, nan influencia ta limita compara cu e ministernan Hulandes. E conseho ta pidi pa duna mas derecho den proceduranan, den continuidad y sosten pa nan por representa nan pais cu dignidad.
E hecho cu Aruba ainda no tin un minister plenipotenciario, ta mustra un contradiccion grandi na e recomendacion di Raad van State. Representacion den Reino no ta simbolico, e ta constitucional. Sin un minister plenipotenciario, Aruba ta perde su bos y ta pone den peliger su igualdad den Reino.
