Segun Ivo Valdes di OPPA:
*Indexering ta keda un asunto sin haya contesta
ORANJESTAD (AAN): Ivo Valdes, di e organisacion di pensionadonan OPPA , a duna di conoce cu Prome Minister Evelyn Wever-Croes a bisa cu APFA tin cu duna indexering na e pensionadonan.
Valdes a declara cu e unico forma cu APFA ta duna e pensionadonan indexering ta si e grado di cobertura ta riba 105 % neto. Mientrastanto, a agrega, e pensionadonan ta drenta den e supermercadonan y ta wak con caro e costo di bida a bira.
Dia pa dia e entrada di e pensionado ta bira menos. Pesey Ivo Valdes ta kere cu nan tin tur derecho di reclama un ahustacion. E ta corda cu e tabata paga un tempo 'solidariteit belasting' tempo cu Lago a cera. "Nos a mantene e luga aki ariba pia".
Aworakinan, nan no ta wordo invita pa sinta na mesa pa wak ki areglo por bin cu ne. Tin diferente areglo, a recalca, pero no mester keda lucha pa haya atencion di gobierno, a agrega.
Segun Valdes, tin rond di 8 mil pensionado cu ta haya un pension bao di e margen di e 'bestaansminimun'. Y ainda e asunto ey no ta haya su debido atencion. Esey ta un di e luchanan di OPPA pasobra e tene dos foro di adulto mayor caminda e señala tur e problemanan y no mester keda solamente na señala e problemanan, pero mester cuminsa atende cu e problemanan ey di berdad, a declara.
Diadomingo cu a pasa, OPPA tabatin su reunion general. E miembronan ta rabia pasobra a manda carta pa gobierno y no ta haya niun contesta. "Nos ta manera un grupo di hende bandona. Nan n' kier scucha nos", a bisa.
E miembronan di OPPA ta di opinion cu mester bay ariba caya pasobra n' por ta asina cu ta skirbi carta tra'i carta y n' ta haya contesta. E opcion cu ta resta ta pa mustra nan preocupacion di un otro forma. Tin miembro cu kier bay dilanti di Bestuurskantoor ora cu tin barco di turista den waf, pa asina gobierno haya berguensa pasobra e grandinan ta para dilanti di porta di gobierno ta protesta, Valdes a declara.
OPPA lo keda manda carta pa sikiera sinta na mesa dialoga cu Prome Minister y Minister Arends.
El a tende cu tin un mocion pa elimina e lista positivo di remedi, cu e intencion pa den futuro e pensionadonan no tin nod'i paga remedinan cu AZV no ta cubri. Mester wak kico ta bay pasa pasobra te ainda OPPA n' tende nada, Valdes a finalisa bisando.
