Sindicato ABV ta adverti riba posible accion
ORANJESTAD (AAN): Segun Sindicato di Enfermeronan di Aruba, ABV, for di comienzo di e proyecto di construccion di un Hospital nobo a start un pesadiya pa tur empleado di hospital, y e pashentnan cu mester a soporta pa traha den situashon nan insigur na pia di trabao.
Cu sonidonan fuerte, stof, holor malo di boiler, lekmento di azeta, tubonan di awa ta kibra, mudamento continuamente di un lugar pa otro. Diferente biaha mester a stop actividad operational entre otro cirugianan planea, tambe stop testnan di radiologia manera CT Scan, saca X-Ray, y tuma Echo.
Tur esey a trece un crecimento di lista di espera pa operashon. Pashentnan ta worde pusha di cashi pa muraya. Trahadornan trahando bou di un stress enorme.
Sindicato ABV a mustra cu awe ainda e construccion no por keda cla. Na final ta pueblo tin cu bay paga pa e proyecto fracasa aki y di awor caba tin algun departamentonan cu ta cla caba mester di un renobacion pa mal calidad di trabao.
“Enbes nos a crece den mas cama pa patient a bira menos cama den e renobashon di un hospital nobo.”
Mientras tanto SOGA y e contratista general OHL a yega na un acuerdo mutuo y a termina e contracto despues di un disputa entre partidonan. Mientras tanto a sinta cu tur stakeholdernan pa termina e proyecto aki cu contratistanan local. Tin un presion enorme riba personal encuanto e cama nan y capacidad di admision.
Pa garantiza cuido medico na comunidad di aruba i tambe turismo mester caba cu e proyecto pa asina tin mas espacio pa interna patient den hospital. Un di e aspecto cu tin cuido en general lomba contra muraya ta e inkorting 5.5% cu tey keto bay riba cuido cu tin consecuencia pa ofrece un bon calidad den cuido
CAO nan ta practicamente para pa e motibo aki. Sindicato ABV ta spera cu pronto lo stop e reduccion di 5.5% aki y por spera pronto accion di protesta si no bin un paro den esaki.
