Nan a canta “Make Love not War” y crea un mundo material
*Merca mester atende 76 Miyon teenager cu a bira pensionado
*Na 2030 tur Babyboomers a alcansa edad di baha cu pensioen
ORANJESTAD (AAN) — Despues di Segundo Guera Mundial, algo extraordinario a tuma lugar.
E restauracion di mundo a pone placa lora. Oportunidad nobo di trabou y bon entrada a habri pa famianan. Esaki a haci cu famianan tabata tin mas recurso financiero pa crea yiu, loke a haci cu a cantidad di yiunan a aumenta barbaramente.
Oficialmente a wordo papia di un explosion di baby, un asina yama “babyboom” y e criaturanan cu a nace a wordo clasifca como “babyboomers”.
Pobresa serio na varios pais a baha considerablemente of disparece y na su lugar a haya e inspiracion di exterior pa medio di radio y despues television, cu a cuminsa domina e tereno di telecomunicacion.
Baby Boomers ta wordo considera e generacion cu a nace den e tempo cu tabata tin mas placa na mundo y hopi di e miembronan lo admiti con for di edad tempran nan tabata parti di nan grupo.
Un grupo cu a conoce television y radio. Guitara electrico a cuminsa grita cancancionnan nobo cu gruponan cu a haya renombre a presenta.
E grupo aki a dicidi cu e ta cambia mundo y a bira e gruponan di protesta, cu riba e caminda largo a deshaci di discriminacion di hende muher y despues a cuminsa traha riba discriminacion di hende di color.
E tabata tempo di protesta. Cancionnan di protesta a cuminsa resona tur caminda. Den e temporada a parce cu hende a cansa di mundo y kier a bau luna.
Placa tabata lora.
Tur caminda tabata tin fiesta y tabata tin motibo pa fiesta cu e cantidad di desaroyo.
Naturalmente tabata tin problemanan. Hobennan tabata wordo recluta pa bay bringa den guera na Vietnam.
“Make love not war” tabata e pensamento di gruponan cu tabata nenga di bay bringa.
Protestanan tabata wordo tene tur caminda.Conciertonan na aire liber.
Crisis di Cuba a hinca mundo den suspenso, Pero mundo a sobrebibi.
“Make Love not War” tabata e grito di hobennan, cu a cuminsa duna prueba di nan talentonan empresarial.
E prome minirok a haci Twiggy popular. Despues el a bira rico.
Tabata tin placa, cu awe a caba. Tabata tin placa Tabata tin placa pa adelanto medico. Asina por sigui.
Un generacion nobo di hende grandi a surgi. A scrap e palabra “bieu”.
E hende cu tabata wordo yama bieu den pasado, a bira “senior” of “hende grandi” na Aruba.’Edad d hende a subi.
Awe mundo ta den un problama cu mester haya contesta. Mundo tin suficiente lugar pa e generacion nobo di hende grandi keda? Kico mundo por ofrece hende grandi, cu a conoce rond mundo como turista?
Cual ta e cuido cu mundo tin pa e grupo aki haya e cuido cu e mester y pa cual hasta e por ta sigura?
Cuano placa mundo tinpa den e crisis mundial sigui duna servicio di clase na e hende grandi?
Empresa ta cambia di doño y ta wordo cambia.
E pregunta grandi ta keda, comunidad tin placa pa duna grandinan pa nan por sigui disfruta di biehes? Cuanto placa tin pa nan cuido? AZV tin fondo pa sigui paga pensioen di bahes y AZV tin placa pa enfermedad?
Pregunta y mas pregunta ta surgi mientras e generacion mas rico den historia, ta gosa di su bida cu continuamente ta parce di bira mas largo.
Un fenomeno nobo ta penshonadonan cu hasta despues di 70 ta keda na trabou y e fectonan cu e tin riba hobennan?
E generacion cu a yena barconan di cruise ta despedi. E generacion cu a gasta hopi placa na Aruba.
Nan ta laga atras nan herencia cu ta tur e cambionan cu nan lucha a laga atras.
Mayoria a traha bon cu e placa cu nan a gana den tur sector.
E ultimo cambio di generacion di Baby Boomers, lo ta e momento cu nan entrega na nan herederonan, e sudor di nan frenta.
Cada dia ta marca traspaso di poder, di bienes na hobennan na salida di e generacion mas rico di mundo cu awe ta un reto pa Cuido y Salud Publico pero tambe pa motibo di nan exigencia di keda deportista, di keda gosa di bida y no laga edad dicidi.
Nan ta sigui biba a base di nan creencia, di e cambionan di comunidad cu nan a introduci y den cual hende ta keda activo y participante di e mundo pa cual el a lucha.
E pregunta grandi lo ta, con mundo sin placa ta entrega e generacion mas rico, e calidad di b9ida cu semper el a conoce.
