ORANJESTAD (AAN): Colegio di Supervision Financiero CAft ta na Aruba un biaha mas y
durante un conferencia di prensa Diabierna presidente Raymond Gradus a duna di conoce cu economia di Aruba ta recuperando na un manera prospero.
“Den e lunanan di April y Mei turismo a supera e nivel di prome cu e pandemia di 2019”.
Aruba mester probecha di e periodo di recuperacion aki pa pone su presupuesto na ordo. Ta imperativo pa Aruba sigui e recomendacionnan di CAft den e presupuesto aproba di 2022, reduci e deficit di financiamento na 2022 y logra un surplus di 1 porciento di e PIB den su presupuesto for di 2023, Gradus a indica.
El a sigui bisa cu reduccion di e debe publico di AWG 5.900 miyon (aproximadamente 104% di e PIB) te na un nivel aceptable, ta sigui ta un tarea importante.
Ademas, mester introduci reforma pa garantiza e sistema di seguridad social pa e generacionnan di futuro.
“E panorama pluri-annual, manera presenta den e presupuesto aproba di 2022, ta mustra cu e deficitnan di financiamento lo keda te cu 2026”.
Door di esey e debe publico nominal lo sigui aumenta den e proximo añanan. Entretanto interes ta sigui subi y ta preparando refinanciamento robusto. Ta esencial pa Aruba reduci su deficitnan, pasobra si no e gastonan di interes ta bira incontrolable, segun e presidente di CAft.
El a sigui bisa cu CAft ta haya necesario cu mester reduci e deficit di financiamento e aña aki mes caba y cu for di otro aña lo tin un surplus di 1% di e PIB. Tambe sostenibilidad di e debe publico di Aruba ta haci esey necesario.
Segun Gradus, for di April 2022 turismo ta superando e nivel di prome cu pandemia.
Cu e recuperacion rapido aki tambe economia ta recuperando na un manera prospero. Segun e ultimo cifranan, aña pasa economia a crece cu 17,2 porciento. A pesar di esey e presupuesto di 2022 ta mustra un deficit di financiamento di AWG 236 miyon pa e sector publico (4,2 porciento di e PIB). CAft a haci recomendacion na e presupuesto di 2022, cu particularmente ta vigila control di gasto. E gastonan pa bien y servicio ta aumenta den presupuesto cu 22 porciento en comparacion cu e añanan di prome cu pandemia, mientras cu no ta splica suficientemente e necesidad di e aumento considerable di gasto aki.
“E gastonan di personal y e contribucionnan di pais na e empresanan di Gobierno tambe ta aumentando innecesariamente”.
Te ainda no a sigui e recomendacionnan di CAft, y door di esey por lo pronto e deficit di financiamento ta innecesariamente halto e aña aki, segun Gradus.
El a sigui bisa cu for di 2023 lo implementa un reforma fiscal, di cual introduccion di un IBA (BTW/VAT) ta un parti importante. E entradanan fiscal proveniente di e reforma aki ainda no a keda suficientemente splica den e presupuesto. Consecuentemente, no por determina e grado di realismo di e entradanan fiscal suficientemente.
Mester señala cu e proceso legislativo di e introduccion no a cuminza ainda.
E hecho di no alcanza e fecha di introduccion previsto, esta dia 1 di Januari 2023, lo tin un influencia negativo riba e haltura di entrada fiscal y riba e saldo di financiamento na 2023.
Presidente di CAft a duna di conoce tambe cu Reforma den seguridad social y cuido ta necesario pa garantiza sostenibilidad di e sistema pa e generacionnan futuro. Economizacion di AWG 60 miyon den cuido ta un prome paso pa cuido sostenibel y lo mester garantiza cu pais Aruba no mester contribui a corto plaso pa compensa e deficitnan di AZV.
Debi cu ainda no a formalisa introduccion di un contribucion propio y reduccion di e lista positivo di remedi, Aruba ta spera di no alcansa e obhetivo di economizacion aki di AWG 60 miyon na 2022. Sinembargo, ta di gran importancia pa ehecuta e medidanan di economizacion na termino cortico.
Un retraso den introduccion di e medidanan aki ta conduci na perdida di economizacion.
“ Den caso di falta di compensacion pa e perdidanan di economizacion aki, e resultado di AZV lo keda afecta negativamente, y cu esey e saldo financiero di Pais Aruba, den caso cu un contribucion nacional ta necesario pa compensa e deficit di AZV”, Gradus a duna di conoce.
El a bisa tambe cu e maneho financiero y e ciclo di hustificacion di Aruba no ta na ordo. Elaboracion di e cuentanan anual di 2019 y 2020 a sufri ainda mas tardanza, loke a provoca un retraso considerable.
E retrazonan aki ta resultado di deficiencia den e maneho financiero.
