Transicion pa futuro di calidad ta cuminsa cu reto grandi pa hende
- Depresion creciente ya ta afecta casi mitar di hobennen na mundo
- Hobennan mester ricibi sosten pa nan por restora e mundo actual
ORANJESTAD (AAN)- “Hende ta riba e bon caminda, cu mester conduci na felicidad cu mester ta resultado di tur gobernacion na mundo?”
Siglo 21. Hende ta domina espacio. Hende ta baha te den profundidad di laman pa descubri secretonan cu ta papia di su pasado.
Hende a bira poderoso. Hende por uza tecnologia, cu ta haci cu hende no tin ni necesidad pa cansa su cabez.
Bida a bira facil. Hende ta dispone di cantidad di artefacto pa asisti den realisacion di trabou, cu mas y mas ta bira produccion di placa pero no ta produci e satisfaccion cu hende kier sinti pa asina labor tambe bira parti di felicidad real di hende.
Cu algo no ta cuadra cu realidad humano, ora nos midi actitud y expresion di hende y bay profundisa den estudionan cientifico cu ta wordo haci di e estado di hende den nos tempo moderno, ta algo cu ta bisto.
Estudio di ultimo añanan ta revela, cu e pandemia Covid-19 sigur tabata tin un impacto enorme riba e mente humano y asina riba e sentido di felicidad di hende cu na prome lugar a perde su sentido di “todopoderoso”enfrente un virus.
Hende mester a lucha, defende su mes, sconde pa un virus cu a bira un arma mortal invisibel y a deshaci den un rato di e sentido di poder absoluto di hende.
Diripiente e hende cu ta bay luna, no por a habri ni su porta di cas pa subi caya.
Normalidad di bida a wordo paralisa y te awe hende ta atento enfrente e peliger di e Coronavirus y otro enfermedad cu por ataca.
Depresion a haya un momento di culminacion. Depresion, cu ya hende a ignora aunke e cantidad di receptnan cu rond mundo ta wordo entrega pa atende cu estado mental di hende, ta aumenta.
Ehercicio fisico, tecnicanan nobo pa relaha, ta uni na otro pa hende por bandona e realidad di tur dia, cu a haya mas forsa na 2022 ora inflacion a mishi cu e placa cu hende tin disponibel pa lubida su miseria.
Baki di sushi ta papia di cantidad di cuminda cu hende ta cumpra sin por come. Cuminda cu ta costa placa, pero no por deshaci di algo cu ta mas cu hamber y cu hende ta sconde tras di e necesidad pa continuamente atende cu un telefon, no pa e haci yamada pero pa evita cu e mester papia cu hende.
Na e momentonan aki atrobe, mundo ta presenta un escenario, cu ta mishi imediatamente cu e concepto di bienestar y felicidad di hende y ta produci depresion.
October no ta trece sonido di alegria di fin di aña y posibilidadnan nobo pa futuro, pero ta produci alarma pa un mundo den estadio di guera, cu ta destrui bienestar y felicidad di hende, aunke hende por ta biba leu di e region caminda e confrontacion ta tuma lugar.
Na momento cu hende mester planea con e ta reconstrui e basenan di convivencia humano na mundo, hende ta den incertidumbre, den ansia, den dolor y tur loke ta produci depresion na un of otro grado.
Un mundo na guera ta cuestiona e maneho di planeta Tera, cu mester a produci un felicidad enorme cu e capacidad extraordinario di hende pa mehora calidad di bida.
E sentido di poder di hende pa sobrevivi hasta e enemigo invisibel di Covid-19, atrobe ta wordo afecta pa un situacion mundial, un guera peligroso y devastador cu ta destrui paz mundial.
Luna di October ta conoci como e temporada cu nos ta cuminsa papia di Paz pa Hende y den un ambiente positivo ta pone hasta telefon un rato un banda, pa saborea e ambiente di speransa y positivismo pa por sigui cana den un futuro nobo.
E tema di e analisis di awe ta basa hustamente riba loke mas ta biba awor cerca nos tur como hende. Kico fin di 2023 lo haci cu bienestar, cu felicidad di hende?
E contesta ta e realidad di un reto pa nos tur.
Con enfrenta e peliger di depresion creciente, dor di uza e parti positivo di nos capacidad, pa splica loke a haci robez, confronta erornan cu madurez y permiti analisis di nos realidad, bira yabi pa un comunidad mundial cu no ta basa su mes riba material, pero riba e balor y capacidad positivo enorme di hende cu a descubri candela, a descubri cu mundo ta rondo pa asina skirbi historia humano cu un generacion nobo mester perfecciona.
