Refineria cu por a bini Aruba cu lugar spectacular den mundo
- Citgo ta depende di Biden pa petroleo di Venezuela bay Merca
- Terminal nobo di azeta na Rusia ta opone Acuerdo di Clima
ORANJESTAD(AAN)- Na momento cu un enviado di Presidente Mericano, Joe Biden, a bishita Venezuela den un situacion mundial sumamente pisa, e compania Mericano Chevron a haya tur atencion.
Mientrastanto Citgo te awe ta un problema diplomatico mundial mucho mas spectacular.
Pa Aruba e desaroyonan mundial actual ta duna prueba pakico na 2018 DIARIO a ocupa su mes cu uno di su investigacionnan mas grandi cu tabata e proyecto Citgo, cu mester a bira salbacion financiero y economico di Aruba.
Pa DIARIO presenta informacion na Aruba, na prome lugar mester determina e situacion den cual sucesonan ta produci nan mes.
Na momento cu e Guera na Ukraine a start y petroleo a lanta para contra bienestar mundial, DIARIO a informa Aruba riba e cantidad di conflictonan di interes cu tabata presente den economia mundial.
Conkista Ukraine y mas parti di loke tabata Union Sovietico, no tabata un ideal nobo di Rusia na 2021 ya cu for di 2014 Rusia ta biba cu medida di mundo liber pasobra el a conkista, anexa paisnan liber cu tabata parti di Union Sovietico.
Na 2021, sinembargo, e decision mundial pa na 2050 introduci medidanan cu lo “Net Zero” deshaci di petroleo y gas como productornan di energia, lo a afecta Rusia seriamente.
Loke poblacion di mundo no a duna atencion tabata cu Rusia na 2021 a introduci un proyecto pa e terminal mas grandi di decada mundialmente na Polo Norte.
E proyecto ta na encargo di Rossneft y na 2024 mester cuminsa sirbi interes petrolero mundia cu exportacion.
Ta trata di un proyecto di 170 Biyon y Rusia a anuncia inicio di e trabounan pa produccion di e petroleo cu e kier bende cu mundo.
Mundo semper a mira Rusia como poder militar y mitiga e posicion di Rusia como number Dos riba e lista di paisnan productor di petroleo na mundo despues di Merca cu ta productor number uno di petroleo na mundo.
Rusia no a bay di acuerdo cu 2050 pa pone fin na petroleo y gas, pero a dicidi cu na 2060 mundo lo a despedi di petroleo y gas.
Pues Rusia no ta parti di e Acuerdo di Clima cu el a opone y cu a causa cu e bueltanan di prijs di petroleo mundialmente for di fin di 2021.
E Guera na Ukraine a bira e factor cu lo a manda tur prijs mundial halto ya cu prijs di petroleo a subi.
Mundo a atende cu Rusia y a pone embargo riba Rusia, teniendo na cuenta e produccion petrolero di Rusia di cual Europa tabata depende.
Cu Guera di Ukraine, e Guera di Petroleo di mundo a start y ta visibel den cambionan grandi cu a presenta rond mundo.
Aruba tambe por tabata parti di e sucesonan mundial si e proyecto Citgo a bini Aruba ya cu te awe Citgo ta un batata cayente pa mundo diplomatico internacional, manera a keda comproba ora Biden a bishita Venezuela.
Sin duda mas cu permiso pa Chevron Venezolano exporta petroleo y ex gerentenan di Citgo cu Maduro a detene, a wordo discuti.
Merca te awe tin Citgo cu ta propiedad di Venezuela y asina propiedad di Rusia tambe den su man ya cu Citgo ta na Merca cu ta reconoce Juan Guaido y no Nicolas Maduro como Presidente.
Awe e situacion di Citgo, un compania Venezolano di cual Rusia tin casi mitar como borg, ta bira caso diplomatico sumamente interesante ya cu Presidente Mericano Biden mester dicidi, si Citgo por importa petroleo Venezolano loke lo mehora economia di Venezuela bou regimen di Nicolas Maduro.
Si Citgo tabata estableci na Aruba tambe, Aruba awe lo tabata parti di e batata cayente di Citgo cu den un confrontacion militar mundial ta situa na Merca pero tin interes directo di Rusia, ta cu Rossneft a entrega tur su interesnan directamente na Rusia.
Segun informantenan durante e bishita di Biden na Venezuela, Citgo na Merca cu ta rehen di Gobierno Mericano, sigur a wordo atende.
Informantenan a adverti cu e situacion mundial por conoce momentonan nobo.
DIARIO ta pendiente di mas informacion den un situacion mundial cu petroleo ta haci cada rato mas tenso cu prijsnan petrolero inconstante cu ta afecta economia mundial, cu ta keda prepara pa un recesion severo.
