Loke na hopi pais grandi na mundo ainda ta un soño --- *Hopi turista ta keda asombra con ta habri cranchi y bebe awa --- *E calidad di awa di Aruba ta un atraccion turistico pa e isla
ORANJESTAD(AAN)- Prijs di awa ta na discusion atrobe. Por spera cu den e proximo dianan, e lo bira un topico importante pa mundo politico cu semper mester di pisca chikito pa por pisca e pisca mas grandi.
Kico bisa di e disputa?
Pues pa analisa e situacion mester sali for di un gran realidad. Hopi turista cu yega Aruba, ta keda encanta cu e hecho cu na Aruba por habri cranchi y bebe awa limpi.
Pa un grupo mas grandi, ta un encanto pa mira con Arubianonan ta core den auto, cu nan ta laba cu awa cu ta wordo produci na un compania cu yama WEB!
Awe mundo politico ta busca un forma pa atende cu e necesidad di subi prijs di awa den un situacion mundial, cu ta haci cu prijs di awa ta sigui y sigui subi y cu gran incertidumbre kico lo pasa den futuro.
Na Aruba ta atrae turista cu e anuncio cu por bebe e awa cu ta sali di cranchi. Pakico e anuncio aki?
Pa e simpel motibo cu no ta na tur lugar na mundo, hende por habri cranchi y bebe awa.
Hopi turista na nan cas mes lo tin problema pa bebe e awa cu nan cranchi ta produci, manera ta e caso na Aruba.
Awor nos no ta para keto na e hecho cu na Aruba nos ta bebe awa limpi.
Pakico para keto cu ta bebe awa limpi, si ta e awa aki nos ta uza pa limpiesa di cas y hasta pa laba tur sushedad? Pakico para keto riba awa na Aruba, caminda nos ta cumpra boter di awa pasobra tin boter di awa, pero nos no por garantisa cu e o.
calidad di e awa den boter ta mes halto cu e awa cu cual nos ta laba hasta nos baño.
Costumber ta haci hende lubida. Nos ta lubida e luho grandi di por habri cranchi y laga awa basha sin preocupa nos cabez kico lo pasa.
Hopi bez ta hari hende cu ta demostra cu nan kier economisa.
Na momento cu nos ta laba auto cu awa di cranchi, na hopi pais na mundo, programanan di asistencia ta percura pa hende no muri pa falta di awa.
Na cantidad di pais grandi ainda e sistema di purificacion di awa manera Aruba conoce, no ta algo di tur dia.
Bebe awa di cranchi ta un atraccion turistico di Aruba. Hopi turista ta dicidi pa bini Aruba pasobra aki nan no ta core peligro cu nan mester bolbe cas cu air ambulance pasobra awa tabata tin bacteria peligroso.
Aruba ta un pais bendiciona, cu interesnan manera politica ta yena cu turbulencia sin realisa cu asina tambe ta kita for di e Arubiano e gozo di ta Arubiano y di ta biba na un pais cu ta ofrece su ciudadanonan loke hopi pais grandi no por duna su hendenan.
Na Aruba ta laba auto, ta laba cas, ta laba baño cu awa di cranchi. Awa produci pa WEB, awa destila cu ta atrae turista.
Awe permiti e glas di awa cu ta bebe demostra cu Aruba ta bendiciona. Mira e lista di e lucha di Nacionnan Uni pa na 2030 tur pais tin awa limpi pa bebe. Pensa riba lodo den cual na tanto pais hende ta bula.
Ban busca solucion pa prijs di awa pero tambe sea agradecido cu turistanan ta bini Aruba pa bebe awa di lama cu ta wordo destila na un prijs halto y asina ta defini e calidad di bida, e salud di Pueblo di Aruba!
